Ledi Bianku, ish-gjyqtar në Strasburg, dhe Kujtim Cakrani, avokat i Ruben Saraivës, kanë paraqitur një raport dhe një dëshmi në “Royal Court of Justice” në Londër, duke mbështetur bllokimin e ekstradimit të Edmond Haxhisë. Ai akuzohet nga prokuroria e Lezhës për organizimin e vrasjes së Ardian Nikulajt në Prill 2023.
Gazetari i Top Channel, Muhamed Veliu, ka siguruar dokumentin “Sekeleton Argument”, i cili është dorëzuar nga avokatët Ben Watson KC dhe Rebecca Hadgett. Ky dokument argumenton se ekstradimi i Haxhisë është i papajtueshëm me ligjet mbi të drejtat e njeriut, duke theksuar rrezikun për jetë për të në burgjet shqiptare dhe mundësinë që ai të mos ketë një proces gjykimi të drejtë.
Mbrojtja e Haxhisë ka katër pretendime kryesore: rreziku i dënimit me burgim të përjetshëm, kushtet e burgut në Shqipëri, pasiguria e garancive nga prokuroria dhe mundësia e mohimit të një gjykimi të drejtë. Bianku ka theksuar se garancitë e dhëna nga prokuroria nuk janë ligjërisht të detyrueshme për prokurorët që trajtojnë çështjen.
Avokati Kujtim Cakrani ka përmendur probleme në procesin gjyqësor të Ruben Saraivës, duke nënvizuar mungesën e një përkthyesi dhe trajtimin e tij në izolim, si dhe papërgjegjësinë në njoftimin e seancave gjyqësore. Ai ka akuzuar gjyqësorin për shkelje të të drejtave të Saraivës.
Cakrani gjithashtu ka ofruar prova për kërcënime ndaj një dëshmitari, Erlind Gjini, në përpjekje për ta detyruar atë të akuzojë Haxhinë për vrasje. Avokati Ben Watson ka theksuar se, si Cakrani ashtu edhe Brunilda Jaho, përballen me kërcënime për shkak të përfshirjes së tyre në këtë rast.
Mbrojtja e Haxhisë shpreson të fitojë të drejtën për të apeluar vendimin e ekstradimit, i cili po shqyrtohet në “Royal Court of Justice” më 2 Dhjetor 2025. Në këtë seancë do të dëgjohen argumentet e përfaqësuesit të shtetit shqiptar, pas së cilës gjykatësi Mr. Justice Swift do të marrë një vendim.
