Autoriteti Rrugor Shqiptar (ARRSH) do të nisë më 13 tetor 2025 një projekt riparimi të shtresave asfaltike në segmentin rrugor Vorë–Ura e Dajlanit, që do të shkaktojë bllokime të përkohshme të trafikut. Ky projekt, i titulluar “Emergjencë për riparimin e nënshtresave dhe shtresave asfaltike”, ka si qëllim përmirësimin e cilësisë së qarkullimit dhe sigurisë rrugore në një nga akset më të ngarkuara të vendit.
Punimet do të realizohen në disa segmente të ndara: Vorë–Maminas, Maminas–Sukth, Sukth–Fllakë, Fllakë–Mbikalimi i Shkozetit dhe Mbikalimi i Shkozetit–Ura e Dajlanit. Çdo segment do të ketë një kohëzgjatje punimesh nga një deri në dy ditë, duke u bazuar në kushtet teknike dhe motin.
ARRSH rekomandon që gjatë këtyre punimeve, përdoruesit e këtij aksit të përdorin rrugën alternative: Vorë–Maminas–Katër rrugët e Shijakut–Durrës, për të shmangur vonesat dhe për të lehtësuar qarkullimin. Pasi të përfundojnë punimet në drejtimin Vorë–Durrës, ndërhyrjet do të vazhdojnë në kahun tjetër, Ura e Dajlanit–Vorë, duke ndjekur të njëjtën ndarje segmentesh dhe afate kohore.
ARRSH thekson se këto punime janë pjesë e një programi të gjerë për rritjen e standardeve të mirëmbajtjes së infrastrukturës rrugore kombëtare. Autoriteti kërkon mirëkuptimin e qytetarëve për çdo vështirësi të mundshme që mund të shkaktohet gjatë zbatimit të projektit dhe garanton se ndërhyrjet janë të domosdoshme për sigurinë e përdoruesve të rrugës.
