Miliona kinezë u përballën me radhë të gjata në rrugë të hënën, më 6 tetor, pas përfundimit të festimeve për Ditën Kombëtare dhe Festën e Hënës, që zgjatën tetë ditë. Stacioni më i madh i pagesës në provincën Anhui u mbush me automjete, duke shkaktuar një situatë kaotike që u pasqyrua në mediat sociale. Videot tregojnë kabinën e pagesës me 36 korsi, e mbushur me makina që prisnin të kalonin.
Sipas autoriteteve, mbi 120,000 automjete kaluan në këtë stacion vetëm ditën e fundit të festës. Pamjet nga droni të këtij stacioni ilustruan shkallën e bllokimit, me rradha që formonin deri katër korsi për të arritur deri në kabinat e pagesës.
Festiviteti i Mesvjeshtës, një ndër festivalet më të rëndësishme në Kinë, u përkoi këtë vit me Ditën Kombëtare, duke zgjatur festën nga 1 deri në 8 tetor. Sipas Ministrisë së Kulturës dhe Turizmit, janë kryer rreth 888 milionë udhëtime gjatë festës së këtij viti, një rritje e dukshme nga 765 milionë udhëtimet e vitit të kaluar, kur festa zgjati vetëm shtatë ditë.
Ky bllokim masiv i trafikut në stacionin Wuzhuang rikujtoi shumë shoferëve situatat e ngjashme gjatë periudhës së Vitit të Ri Kinez. Një rast i famshëm ndodhi në vitin 2010, kur një bllokim trafiku 12-ditor paralizoi autostradën Pekin-Tibet, duke lënë mijëra shoferë dhe pasagjerë të bllokuar për gati dy javë për shkak të një serie prishjesh kamionësh.
Në përgjithësi, situata e këtij viti ilustron një rritje të dukshme në numrin e udhëtimeve gjatë festave në Kinë, duke sjellë me vete edhe sfida të mëdha për infrastrukturën rrugore.
