Deloitte ka njoftuar se do të rikthejë një pjesë të tarifës prej 440,000 dollarësh, e cila i ishte dhënë qeverisë australiane për një studim me gabime, disa prej të cilave u zbuluan të ishin të lidhura me përdorimin e inteligjencës artificiale. Departamenti i Punësimit dhe Marrëdhënieve në Vendin e Punës (DEWR) ka konfirmuar rikthimin e këstit të fundit të kontratës dhe do të publikojë detaje pas përfundimit të procesit.
Studimi, i cili u porosit në dhjetor 2024, kishte si qëllim vlerësimin e sistemit të IT-së për ndëshkimin e personave të papunë që nuk përmbushin detyrimet e punësimit. Hetimi zbuloi probleme serioze si “mungesë transparence” dhe “mosfunksionime teknike”. Problemet u theksuan nga një akademik i Universitetit të Sidneit, Dr. Christopher Runtz, i cili identifikoi gabime në raport, duke e quajtur këtë fenomen “halucinacione” të inteligjencës artificiale, e cila prodhon informacion të pasaktë.
Deloitte publikoi raportin e tij më 4 korrik, por disa javë më vonë, Australian Financial Review njoftoi për gabimet në burime dhe referenca të pasakta. Në një version të rishikuar, kompania pranoi se ishin bërë disa korrigjime, por sqaroi se përfundimet dhe rekomandimet kryesore mbeteshin të pandryshuara. Gjithashtu, raporti përmendi se një pjesë e tij ishte prodhuar me ndihmën e një mjeti të inteligjencës artificiale, të licencuar nga ministria.
Megjithatë, Deloitte nuk pranoi se gabimet erdhën nga përdorimi i inteligjencës artificiale dhe insistoi se ndryshimet nuk ndikonin në përmbajtjen e raportit. Senatorja e Partisë Laburiste, Deborah O’Neill, e kritikoi ashpër kompaninë, duke theksuar se përdorimi i AI kishte zëvendësuar punën njerëzore. Ajo nënvizoi rëndësinë e saktësisë në detyrat e tilla dhe se ata që kontraktojnë me kompani si Deloitte duhet të kenë njohuri se kush e bën punën.
Raporti i përditësuar nga Deloitte gjithashtu pranoi gabimet në prezantimin e mëparshëm, duke përfshirë referenca joekzistente për studime universitare dhe një vendim gjykate që nuk kishte egzistuar.
