Policia e Sarandës ka arrestuar një 49-vjeçar nga Tirana, A. M., i cili prezantohej si prokuror për të marrë shërbime dhe dokumente në mënyrë të paligjshme. Në momentin e arrestimit, ai iu paraqit punonjësve të Policisë si përfaqësues i Prokurorisë.
Ky shtetas ishte në kërkim, pasi kishte shkelur masën e sigurisë “arrest në shtëpi”, të caktuar për të njëjtën vepër penale – mashtrimin si funksionar publik. Ai ishte dënuar më parë për mashtrim, duke marrë para nga qytetarë me premtimin se do t’i punësonte apo do të zgjidhte probleme ligjore në emër të institucioneve shtetërore.
Operacioni policor, i koduar “Deceiver”, çoi gjithashtu në arrestimin e E. Ç., një 19-vjeçar, i cili kishte strehuar A. M. në banesën e tij në Sarandë. Gjatë kontrollit në këtë banesë, policia sekuestroi një armë zjarri automatike tip “Shars”, municione luftarak, dokumente zyrtare, një kompjuter dhe pajisje radio komunikimi të ngjashme me ato të Policisë.
Sipas hetimeve, A. M. u prezantonte qytetarëve si prokuror, duke i mashtruar me premtimin për punësim në institucione shtetërore dhe pagë nga Prokuroria. Kjo ka shkaktuar dëm të konsiderueshëm ekonomik për disa persona, që kanë humbur para për shkak të mashtrimeve të tij.
Materialet hetimore janë dërguar në Prokurorinë pranë Gjykatës së Shkallës së Parë të Juridiksionit të Përgjithshëm Sarandë. Hetimet vazhdojnë për të zbuluar raste të tjera të mundshme të mashtrimeve që mund t’i kenë ndodhur A. M. dhe për të identifikuar të tjerë të përfshirë.
