Zhvillohet në Belfast takimi i ministrave të Jashtëm të vendeve të Procesit të Berlinit, me fokus në temat e pajtimit, sigurisë, integrimit rajonal dhe migracionit. Kjo ngjarje, e cila nënvizon mbështetje për Ballkanin Perëndimor në rrugën e tij drejt Bashkimit European, ka si synim forcimin e bashkëpunimit midis vendeve të rajonit.
Ministri i Jashtëm i Gjermanisë, Johann Wadephul, para nisjes për në Belfast, theksoi se Ballkani Perëndimor është pjesë e “familjes europiane” dhe se rruga drejt BE-së duhet të përshkohet së bashku me të gjashtë vendet e rajonit. Ai e cilësoi Procesin e Berlinit si një katalizator të rëndësishëm për antarësimin e këtyre vendeve në BE, duke theksuar se besimi i njerëzve në një të ardhme të shpejtë në BE është duke u tretur, çka mund të sjellë pasoja të rënda, përfshirë rikthimin e konflikteve të kaluara dhe forcimin e ndikimit të Rusisë dhe Kinës.
Wadephul gjithashtu shprehu nevojën për të nxitur bashkëpunimin e përditshëm dhe përmirësime të prekshme në jetën e qytetarëve, përmes iniciativave si puna ndërkufitare dhe njohja reciproke e diplomave. Ai theksoi se përpjekjet për pajtim midis popujve me histori luftrash dhe konflikti ende kërkojnë hapa të mëtejshëm dhe se Belfast ka një rëndësi simbolike për këtë process, si një qytet që ka kaluar nga përçarjet në pajtim social.
Britania e Madhe, si kryesuese e radhës së Procesit të Berlinit, ka vendosur që t’i japë prioritet çështjeve të pajtimit, sigurisë, integrimit rajonal dhe migracionit. Një samit i kryetarëve të shteteve dhe qeverive është parashikuar për më 22 tetor në Londër. Procesi i Berlinit, i nisur që në vitin 2014, mbështet bashkëpunimin rajonal ndërmjet Shqipërisë, Bosnjë-Hercegovinës, Malit të Zi, Kosovës, Maqedonisë së Veriut dhe Serbisë, dhe përfshin gjithashtu disa vende të BE-së dhe institucione të tjerë të Bashkimit Europian.
