Projektligji i ri në shqyrtim publik ka si qëllim të ndëshkojë dhunën online dhe të mbrojë gratë në politikë nga ngacmimi, kërcënimet dhe çdo formë dhune tjetër. Ky ligj do të krijojë një bazë ligjore që i mbron jo vetëm deputetet, por edhe ato që kandidojnë dhe gratë që ushtrojnë funksione publike dhe politike.
Një përmasë e rëndësishme e këtij drafti është theksimi se ngacmimi nuk do të kufizohet vetëm te gratë, por do të përfshijë gjithashtu kërcënimet ndaj pjesëtarëve të familjes së tyre, që synojnë të pengojnë pjesëmarrjen e tyre në jetën politike. Drafti synon parandalimin dhe mbrojtjen nga dhuna në të gjitha format, përfshirë atë online, me një propozim për të ngritur një regjistër kombëtar të dhunës digjitale.
Më tej, projektligji synon të ndalojë publikimin e çdo materiali që ofendon ose provokon dhunë kundër individëve për arsye të ndryshme, si raca, etnia, bindjet politike, apo pamja e jashtme. Masat për mbrojtjen e grave në politikë përfshijnë heqjen e materialeve ofenduese brenda 12 orëve, ndalimin e autorëve të dhunës nga pjesëmarrja në fushata për deri në 30 ditë, si dhe ofrimin e mbrojtjes policore të përkohshme.
Gratë viktima të dhunës do të kenë të drejtën të kërkojnë urdhër mbrojtje. Kjo nismë thekson nevojën për të afruar legjislacionin shqiptar me atë europian dhe për t’iu përgjigjur kërkesave të shoqërisë moderne. Projektligji gjithashtu parashikon zbatimin e programeve të rehabilitimit për viktimat dhe dhunuesit, me fokus në trajtimin psiko-social për të zvogëluar rrezikun e përsëritjes së dhunës.
Mospjesëmarrja e dhunuesit në këto programe do të konsiderohet shkelje ligjore, duke sjellë pasoja penale. Po ashtu, drafti përfshin masa që parashikojnë fshirjen e përmbajtjes shpifëse dhe bllokimin e profileve të dhunuesve, me gjoba të caktuara nga AKEP për çdo vonesë në zbatimin e këtyre masave.
