Pritjet në Francë janë të mëdha ndërsa populli pritet për një deklaratë nga ish-kryeministri Sébastien Lecornu, e cila do të bëhet sot në orën 20:00. Ky njoftim vjen pas 48 orëve negociatash të udhëhequra nga Presidenti Emmanuel Macron, që do të përcaktojnë nëse vendi do të ketë një qeveri të re apo do të vazhdojë të mbetet pa autoritet ekzekutiv.
Në një dalje të parë, Lecornu konfirmoi se të gjitha forcat politike kanë shprehur vullnetin për të miratuar një buxhet para 31 dhjetorit, një sinjal që përkohësisht largon mundësinë e shpërbërjes së Asamblesë Kombëtare dhe zgjedhjeve të parakohshme. Në një takim me partinë socialiste, udhëheqësi Olivier Faure shprehu se socialistët nuk kërkojnë dorëheqjen e Macron, por një “ndryshim rrënjësor të kursit”, duke propozuar emërimin e një kryeministri të majtë për të lehtësuar miratimin e buxhetit.
Pjesë e nevojshme për pjesëmarrjen e socialistëve në qeveri është pezullimi i reformës së pensioneve, e cila ka ndarë opinionin publik. Faure theksoi se kërkohet një pezullim real, duke u shprehur se cdo përpjekje për të zgjatur reformën do të dështojë. Ai sugjeroi që përfshirja e së majtës dhe ekologjistëve në qeveri do të ishte garanci për ndalimin e reformës.
Megjithatë, formimi i një qeverie të majtë përballet me vështirësi. Socialistët disponojnë rreth 60 deputetë, një numër të pamjaftueshëm për të siguruar mbijetesën në votimet parlamentare. Edhe partitë ekstreme, si tubimi Kombëtar i së djathtës dhe Franca e Paepur, do të votojnë për rrëzimin e çdo qeverie të re, kërkuar hapur zgjedhje të parakohshme.
Në mesin e të gjitha këtyre, Republikanët gjithashtu janë të ndarë. Disa deputetë shprehin gatishmëri për dialog me socialistët, por udhëheqësi Bruno Retailleau thekson se çdo qeveri që prek reformën e pensioneve nuk do të ketë mbështetje. Situata politike përshkruhet si “surreale,” me kushte që e bëjnë të vështirë miratimin e një qeverie që do të mund të miratojë buxhetin.
Me krizën politike që histron Francën, pritjet për shpalljen e Lecornu janë të larta, por besueshmëria e tij është e rrezikuar pas shpërbërjes së qeverisë së sapoformuar.
