Zv.Kryetari i Gjykatës së Posaçme ndaj Krimit të Organizuar dhe Korrupsionit, Erjon Bani, ka theksuar gjatë homazheve për gjyqtarin Kalaja se 99% e gjykatave në Shqipëri nuk përmbushin kushtet e sigurisë. Ai theksoi nevojën e ndërtimit të godinave të reja për të garantuar një ambient të sigurt, duke shtuar se pa siguri, nuk mund të egzistojë pavarësia e gjyqtarëve në dhënien e vendimeve.
“Pothuajse 99% të gjykatave nuk plotësohen kushtet e sigurisë. Asnjë gjykatë nuk i ka këto kushte, prandaj është e nevojshme ndërtimi i ri,” tha Bani. Ai argumentoi se kur një gjyqtar nuk ndihet i qetë, kjo ndikon në drejtësinë që ai mund të japë. Siguria në gjykatë, sipas tij, është thelbësore jo vetëm për gjyqtarët, por edhe për prokurorët, avokatët, palët e tjera në proces dhe qytetarët që ndodhen aty.
Bani theksoi se mungesa e sigurisë ndikon në ndjenjën e sigurisë të çdo individi, duke e bërë atë më të cenueshëm. Ai bëri thirrje për një reflektim të gjerë mbi këtë çështje, për të njohur rreziqet që përballen të gjithë ata që kanë të bëjnë me sistemin e drejtësisë. “Nëse nuk ekziston siguria në gjykatë, edhe qytetari më i thjeshtë ndihet i rrezikuar me jetën e tij,” përfundoi ai.
Ky apel përmirësimi të kushteve të sigurisë në gjykata vjen në një kohë kur shqetësimet për integritetin e sistemit të drejtësisë janë rishtazi në fokus, duke kërkuar veprime konkrete për të adresuar këto çështje.
