Hamasi ka kërkuar lirimin e Marwan Barghouti në kuadër të negociatave me Izraelin për listën e të burgosurve palestinezë që do të lirohen në këmbim të pengjeve në Rripin e Gazës. Marwan Barghouti, një ish-zyrtar i Fatahut, u arrestua nga autoritetet izraelite në vitin 2002 dhe u dënua me pesë burgime të përjetshme në vitin 2004 për vrasje të lidhura me rolin e tij gjatë Intifadës së dytë (2000-2005). Ai konsiderohet një figurë e njohur dhe e respektuar, madje quhet “Mandela i Palestinës”.
Bisedimet indirekte midis Hamasit dhe Izraelit kanë nisur të hënën në Sharm el-Sheikh të Egjiptit, për të diskutuar një plan paqeje të paraqitur nga Presidenti amerikan Donald Trump. Plani përfshin një armëpushim në Rripin e Gazës, kthimin e pengjeve të marrura më 7 tetor 2023, tërheqjen graduale të trupave izraelite nga Gaza dhe çarmatimin e Hamasit.
Al-Qahera News njofton se ka filluar një diskutim mbi listën e të burgosurve palestinezë që do të lirohen në kuadër të një marrëveshjeje shkëmbimi. Përpos Barghoutit, lista përfshin gjithashtu figurat si Ahmad Saadat, Hassan Salameh dhe Abbas al-Sayed.
Kryenegociatori i Hamasit, Khalil al-Haya, theksoi se lëvizja kërkon “garanci” nga Donald Trump dhe ndërmjetësit për të siguruar fundin e luftës në Gaza. Ai shprehu dyshimin mbi besueshmërinë e Izraelit, duke theksuar se nuk kanë mbajtur premtimet e mëparshme për armëpushim.
Al-Haya theksoi se janë të gatshëm të punojnë për një marrëveshje që do të përfshijë fundin e luftës, tërheqjen e trupave izraelite nga Gaza dhe një shkëmbim të pengjeve dhe të burgosurve. Kjo situatë e tensionuar ka sjellë një atmosferë të pasigurtë në negociatat aktuale dhe ka rritur nevojën për një marrëveshje të qëndrueshme.
