Përfaqësues të banorëve të prekur nga shpronësimi në Qendrat Historike të Durrësit kanë dorëzuar sot një kallëzim penal në SPAK, duke protestuar ndaj mënyrës si po zbatohet projekti i zhvillimit urban (TID). Sipas banorëve, ky projekt cenon të drejtat e pronësisë dhe procedurat ligjore.
Ata shprehin indinjatën e tyre për shkeljen e të drejtave si qytetarë dhe pronarë, duke theksuar se nuk janë konsultuar në përputhje me ligjin. Gjithashtu, ata argumentojnë se vlerat e ofruara për shpronësim janë shumë të ulëta dhe nuk u mundësojnë blerjen e një banese të re. Në vazhdën e protestave, banorët nënvizojnë se veprimet e tyre nuk kanë karakter politik, por përqendrohen në mbrojtjen e pronave dhe të drejtave të tyre.
Ky vendim, i cili preku 74 familje, u mor në kuadër të zbatimit të projektit TID (Transformimi i integruar i Durrësit), i mbështetur nga Fondacioni Shqiptaro-Amerikan për Zhvillim. Banorët kërkojnë që autoritetet, si ato vendore ashtu edhe ato qendrore, të rishikojnë vendimin për shpronësim dhe të garantojnë transparencë në procesin e zbatimit. Ata bëjnë të ditur se do të vazhdojnë betejën e tyre deri në gjetjen e një zgjidhjeje të drejtë.
