Ish-kancelarja gjermane, Angela Merkel, ka bërë akuza të rëndësishme në një intervistë për median hungareze Partizan, duke akuzuar Poloninë dhe vendet baltike për ndërprerjen e marrëdhënieve diplomatike midis Bashkimit Evropian dhe Rusisë, një veprim që ajo thotë se ka kontribuar indirekt në agresionin rus ndaj Ukrainës.
Merkel ka diskutuar rreth Marrëveshjes së Minskut të vitit 2015, të cilën ajo ndihmoi ta negocionte dhe që solli një periudhë paqeje midis 2015 dhe 2021, duke i dhënë Ukrainës një mundësi për t’u konsoliduar. Ajo tregoi se në qershor 2021 e kuptoi se presidenti rus, Vladimir Putin, nuk e merrte më seriozisht këtë marrëveshje. Merkel kërkoi një format të ri dialogu përmes BE-së me Putinin, por vuri në dukje se disa vende, kryesisht ato baltike dhe Polonia, nuk e mbështetën këtë iniciativë, për shkak të frikës së tyre rreth politikës së përbashkët evropiane ndaj Rusisë.
Ish-kancelarja theksoi se pandemia e koronavirusit pengoi mundësinë e takimeve direkte, duke e bërë të vështirë arritjen e kompromisave dhe duke kontribuar në radikalizimin e politikës ruse, çka më pas çoi në sulmin mbi Ukrainën. Ajo shprehu se “videokonferencat nuk ishin të mjaftueshme” për të zgjidhur tensionet.
Deklaratat e saj kanë shkaktuar një debat të gjërë, sidomos sepse interpretimi i saj për arsyet e agresionit rus sfidon analizat ndërkombëtare të cilat pretendojnë se ofensiva ndaj Ukrainës ishte një plan afatgjatë i Kremlinit, i pavarur nga veprimet e vendeve baltike ose nga pandemia.
Merkel, e cila ka udhëhequr Gjermaninë nga 2005 deri në 2021, mbetet një figurë kyçe në diskutimet për politikën evropiane dhe marrëdhëniet me Rusinë, dhe vazhdon të ketë një ndikim të rëndësishëm në këto tema.
