Burime të besueshme nga autoritetet gjyqësore greke njoftojnë se kërkesa e Pano Rucit për të zhvarrosur trupin e të birit dhe për të kryer analiza ADN dhe toksikologjike pritet të miratohet brenda ditës nga Prokuroria e Larisës. Pano Ruci, baba shqiptar që humbi djalin Denis në tragjedinë hekurudhore të Tembit, po zhvillon një grevë urie prej 22 ditësh përballë parlamentit grek në Athinë, në shenjë proteste për drejtësi. Ai kërkon një ekspertizë mjeko-ligjore të plotë, me fokus në analizat toksikologjike të trupit të djalit të tij, një nga 57 viktimat e aksidentit.
Kërkesa e tij për transparencë është një pjesë e thirrjeve më të gjerë për zbardhjen e rrethanave të tragjedisë, e cila solli tronditje të gjerë në Greqi. Sipas burimeve, prokuroria gjithashtu pritet të lejojë analizat toksikologjike për trupat e tjerë të viktimave, nëse kjo kërkohet nga familjarët e tyre.
Dita e sotme solli një zhvillim tejet të veçantë, kur Kryepeshkopi Ieronimos II i Athinës dhe gjithë Greqisë vizitoi Pano Rucin, një akt solidariteti që e pranuan shumë media si një mbështetje në këtë moment kritik për shëndetin e Rucit. Kryepeshkopi qëndroi pranë Rucit, e bekoj dhe dëgjoi fjalët e tij, ndërsa babai i dëshpëruar vazhdon të ndihet i rënduar fizikisht, por i vendosur në kërkesën për të vërtetën.
Greva e Pano Rucit ka evoluar përtej një çështjeje personale, duke u shndërruar në një simbol të përpjekjes për drejtësi dhe dinjitet në Greqi, me një mbështetje të gjerë nga qytetarët që e përkrahin atë. Kjo betejë për transparencë dhe për të zbardhur të vërtetën lidhur me tragjedinë e Tembit është bërë një pikë qendrore në debatin publik grek.
