Presidenca e Kosovës ka reaguar ndaj deklaratave të fundit të presidentit të Serbisë, Aleksandar Vuçiç, i cili ka thënë se “të gjithë po përgatiten për luftë.” Në një postim në rrjetin social “X,” Presidenca e Kosovës ka cilësuar këto thirrje si “jehonë e rrezikshme” e historive më të errëta të rajonit. Sipas Presidencës, Vuçiç po refuzon të zgjedhë rrugën e pajtimit, pavarësisht përpjekjeve të shumta amerikane dhe evropiane për të arritur një paqe të qëndrueshme.
Duke kujtuar të kaluarën e Serbisë, Presidenca e Kosovës e krahasoi Vuçiçin me Sllobodan Millosheviçin dhe përmendi luftërat në Kroaci, Bosnjë e Hercegovinë dhe Kosovë. Ajo shprehet se Vuçiç duket se po përpiqet të ringjallë një formulë shkatërruese të nxitjes së konfliktit, duke sugjeruar se gjakderdhja do të ruajë sundimin e tij. “Historia është e qartë; Millosheviqi dështoi dhe kështu do të bëjë edhe Vuçiç,” theksohet në reagimin e presidencës.
Në një mesazh të qartë, Presidenca e Kosovës përfundon duke theksuar se “lufta nuk është një mjet lidershipi,” dhe se vendi ka zgjedhur paqen, të cilën do ta mbrojë me çdo kusht. Kjo deklaratë pasqyron qëndrimin e Kosovës për t’u angazhuar në një dialog paqësor dhe për të shmangur përshkallëzimin e tensioneve në rajon.
