Dy shtetas janë arrestuar nga Policia e Fierit pas një operacioni në lagjen “Apollonia”, ku janë kapur duke qarkulluar të armatosur me një automjet të markës “Audi”. Sipas raportimeve, ata tentuan të largoheshin nga vendngjarja, por forcat e rendit i ndaluan. Gjatë kontrollit, në çantën e supit të drejtuesit të automjetit u gjet një pistoletë me municion luftarak, e cila u sekuestrua si provë materiale, së bashku me automjetin dhe dy celularë.
Nga specialistët e Hetimit të Krimeve, është arrestuar në flagrancë shtetasi G. N., i njohur edhe si G. S., 40 vjeç, banues në fshatin Sulaj, për veprat penale “Mbajtja pa leje dhe prodhimi i armëve, armëve shpërthyese dhe i municionit” dhe “Mosbindja ndaj urdhërit të punonjësit të policisë së rendit publik”. Po ashtu, është arrestuar edhe shtetasja A. P., 31 vjeçe, banues në fshatin Portëz, për veprat penale “Veprime që pengojnë zbulimin e së vërtetës” dhe “Mosbindja ndaj urdhërit të punonjësit të policisë së rendit publik”.
Materialet procedurale për këtë rast i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier, ku do të vazhdojnë veprimet e mëtejshme ligjore.
