Shtetasit e Çekisë po votojnë në ditën e dytë të zgjedhjeve të përgjithshme, ku miliarderi Andrej Babish është në krye të sondazheve për të fituar. Një rikthim i Babishit, ish-kryeministër, mund të ndikojë në mbështetje ndaj Ukrainës dhe lidhjet e vendit me Bashkimin Evropian. Ai ka bërë fushatë me promovimin e rritjes së mirëqenies dhe ndalimin e ndihmës për Ukrainën, duke i tërhequr vëmendjen votuesve që e fajësojnë Qeverinë aktuale të kryeministrit Petr Fiala për neglizhencën ndaj çështjeve të brendshme në favor të ndihmës për Kievin.
Çekia, e cila është anëtare e BE-së dhe NATO-s, ka rreth 11 milionë banorë. Babish, 71 vjeç, shprehu në qytetin e Ostravës se “asgjë nuk është e sigurt” dhe se lufta për fitoren vazhdon. Partia e tij, ANO (PO), udhëheq sondazhet me mbi 30 për qind të mbështetjes, ndërsa grupi i Fialas, Spolu (Së bashku), renditet i dyti me rreth 20 për qind.
Mediat çeke raportuan se pjesëmarrja në ditën e parë të zgjedhjeve ka qenë më e lartë se në zgjedhjet e vitit 2021. Rezultatet e votimit priten të publikohen në mbrëmje. Një rezultat që favorizon Babishin mund të sjellë gjithashtu një afrim të Çekisë me Hungarinë dhe Sllovakinë, dy vende që deri më tani kanë refuzuar dërgimin e ndihmës ushtarake për Ukrainën dhe janë kundër sanksioneve ndaj Rusisë. Një zhvillim i tillë do të mund të ndryshonte ndjeshëm dinamiken politike brenda rajonit dhe pozicionin e Çekisë në skenën ndërkombëtare.
