Robert Morris, themelues i Kishës Gateway dhe ish-këshilltar shpirtëror i Donald Trump, është shpallur fajtor për abuzim seksual ndaj një vajze 12-vjeçare në vitet 1980. Vendimi i gjykatës u shpall këtë javë për ngjarjen që ndodhi në Oklahomë.
Morris, i cili tani është 64 vjeç, pranoi fajësinë në kuadër të një marrëveshjeje me prokurorinë, duke u dënuar me 10 vjet burg. Megjithatë, ai do të kalojë vetëm gjashtë muaj në paraburgim, ndërsa pjesën tjetër të dënimit do ta vuajë nën mbikëqyrje. Ai gjithashtu do të regjistrohet si shkelës seksual dhe do të paguajë 250 mijë dollarë dëmshpërblim ndaj viktimës.
Akuzat lidhen me abuzimin e vazhdueshëm seksual ndaj Cindy Klemischer, e cila raportoi rastin fillimisht në vitin 1987. Ajo deklaroi se Morris, që shërbente si ungjilltar udhëtues, kishte abuzuar me të për katër vjet. Klemischer denoncoi publikisht Morris në vitin 2024, çka çoi në dorëheqjen e tij nga kisha. Ai e quajti veprimin e tij një “dështim moral”, një përshkrim që shumë e konsideruan minimizues.
Edhe pse ngjarja ishte raportuar autoriteteve dhe kishës, asnjë kallëzim penal nuk ishte bërë deri shumë vite më vonë. Gjatë seancës gjyqësore, Morris ishte i pranishëm me familjen e tij, përfshirë gruan dhe fëmijët e rritur.
Ky rast ka rikthyer në vëmendje problemin e trajtimit të akuzave për abuzim seksual në komunitetet fetare në Shtetet e Bashkuara, duke ngjallur pyetje mbi rolin e liderëve shpirtërorë dhe shfrytëzimin e pozitës së tyre. Kisha Gateway, e themeluar nga Morris në vitin 2000, ka rreth 100 mijë ndjekës dhe ndodhet kryesisht në Teksas. Gjatë fushatës presidenciale të vitit 2016, ai ishte përfshirë në rrethin e këshilltarëve shpirtërorë të Donald Trump, por tani emri i tij është i lidhur me një skandal të rëndë që ka tronditur komunitetin.
