Presidenti i Shteteve të Bashkuara, Donald Trump, dhe presidenti i Turqisë, Recep Tayyip Erdoğan, zhvilluan të premten një telefonatë ku fokusi ishte situata në Rripin e Gazës dhe marrëdhëniet dypalëshe mes dy vendeve. Ky komunikim erdhi vetëm tetë ditë pas takimit të tyre në Uashington më 25 shtator, gjatë një vizite zyrtare të Erdoğan.
Sipas një deklarate të presidencës turke, Erdoğan konsideroi vizitën në SHBA si një hap të rëndësishëm për forcimin e marrëdhënieve Turqi–SHBA dhe theksoi nevojën për rritjen e bashkëpunimit, veçanërisht në sektorin e mbrojtjes. Ai shprehu se, “Vizita ime në Uashington forcoi më tej marrëdhëniet tona dhe nevojiten hapa konkretë për avancimin e bashkëpunimit në të gjitha fushat”.
Përsa i përket konfliktit në Lindjen e Mesme, Erdoğan rikonfirmoi mbështetje për çdo iniciativë rajonale që synon vendosjen e paqes. Ai theksoi rëndësinë e ndalimit të sulmeve izraelite për të siguruar suksesin e këtyre përpjekjeve. Sipas tij, Turqia po intensifikon përpjekjet diplomatike për të promovuar paqen dhe stabilitetin në rajon dhe është e angazhuar për të kontribuar aktivisht në përpjekjet globale për paqe.
