Shërbimi Sekret Turk (MIT), në bashkëpunim me Prokurorinë dhe Policinë e Stambollit, ka arrestuar detektivin privat Serkan Çiçek, i cili dyshohet se ka punuar për Mossad-in, agjencinë izraelite të inteligjencës. Operacioni i koduar “Metron Activity” është realizuar pas zbardhjes së informacionit se Çiçek ishte i angazhuar në aktivitete spiunazhi për Izraelin.
Investigimet kanë treguar se emri i vërtetë i Çiçek është Muhammet Fatih Keleş, i cili kishte ndërruar identitetin pas përballjes me borxhe të konsiderueshme. Pas lënies së profesionit të mëparshëm, ai krijoi një agjenci detektivësh në vitin 2020. Kontakti i tij me Mossad-in u bë përmes Faysal Rasheed, një anëtar i Qendrës Izraelite për Operacione në Internet. Çiçek ka pranuar se spiunonte një aktivist palestinez, i cili kundërshtonte politikën izraelite në Lindjen e Mesme.
Më 31 korrik, Rasheed, duke u paraqitur si punonjës i një firme avokatie jashte vendit, e kontaktoi atë nëpërmjet WhatsApp për të organizuar një mbikëqyrje të një aktivisti palestinez në Basaksehir. Për këtë shërbim, ai i ofroi Çiçek 4,000 dollarë në kriptomonedhë më 1 gusht. Çiçek gjithashtu kishte kontaktuar me avokatin Tuğrulhan Dip, i cili është arrestuar po ashtu për lidhjet e tij me aktivitete spiunazhi për Izraelin, duke ofruar informacione nga të dhënat publike për përfitime financiare.
Ky rast nxjerr në pah bashkëpunimin ndërkombëtar në aktivitetet e spiunazhit dhe përfshirjen e individuve që përfitojnë nga informacionet e ndjeshme për interesa personale. Arrestimi i Çiçek tregon për intensifikimin e kontrollit të shërbimeve të sigurisë turke ndaj aktiviteteve të huaja që ndodhin brenda territorit të Turqisë.
