16 mijë metra katrorë është totali i sipërfaqes pa leje që ka ndërtuar biznesmeni Julian Morina me kompaninë e tij “Xheluks Construksion”. Prokuroria e Tiranës ka arritur të mbledhë prova për ndërtime pa leje në disa zona të kryeqytetit dhe ka dërguar dosjen për gjykim.
Gjatë hetimeve mbi disa procedime penale të regjistruara për këtë shtetas dhe kompaninë që ai administron, për periudhën 2021-2024, u konstatua se kjo shoqëri tejkaloi lejet e ndërtimit të marra për godina banimi dhe shërbime në disa raste, thotë organi i akuzës.
Referuar fakteve penale të Prokurorisë së Tiranës, bëhet fjalë konkretisht:
1- Tek Liqeni i Thatë në Farkë, shoqëria “Xheluks Construksion” ishte pajisur me leje ndërtimi për godinë banimi dhe shërbime 1,2,3,4,5 dhe 6 kate me 2 dhe 3 kate nën tokë dhe në tejkalim të saj ka shtuar sipërfaqe ndërtimi dhe volum shtesë prej 2.500m2.
2- Nga kontrollet në terren, u konstatua edhe një objekt tërësisht i ri me 7-kate dhe dy kate nën tokë, i ndërtuar pa leje ndërtimi me sipërfaqe 4.622 m2.
3- “Xheluks Construksion” ka tejkaluar lejen e ndërtimit edhe në godinat e tjera në këtë zonë, duke krijuar sipërfaqe shtesë në lartësi dhe volum me rreth 3.065.8m2.
4- Prokuroria e Tiranës ka administruar dhe ekspertimin teknik në lidhje me punimet e kryera po nga kjo shoqëri në Rr. Elbasanit, nga ku rezultoi se një pjesë e tyre kanë dalë jashtë lejes së miratuar. Në objektin “Godinë banimi dhe shërbimi” 4,5,6 dhe 7 me 2 kate parkim në Rr. Elbasanit, u regjistrua një shtesë ndërtimi prej 5.866.88m2.
Në përfundim të hetimeve, Prokuroria e Tiranës vlerëson se shtetasi Julian Morina duhet të përgjigjet para ligjit për ndërtimet e paligjshme të kryera nga shoqëria “Xheluks Construksion” shpk dhe për tejkalim të lejes së ndërtimit me një sipërfaqe totale prej 15.974.88m2.
Hetimet provuan se janë konsumuar elementët e veprës penale të “Ndërtimit pa leje” parashikuar nga neni 199/a/4 i Kodit Penal nga shoqëria “Xheluks Konstruksion” dhe shtetasi Julian Morina.
