Gati 50 udhëheqës evropianë janë ftuar në Kopenhagen për takimin e shtatë të Komunitetit Politik Evropian, që kësaj radhe do të fokusohet në luftën në Ukrainë dhe sigurinë evropiane. Presidenti ukrainas Volodymyr Zelensky do të marrë pjesë dhe do t’i drejtohet të pranishmëve, duke mbajtur edhe një konferencë për shtyp me kryeministren daneze Mette Frederiksen.
Ky komunitet u propozua nga Presidenti francez Emmanuel Macron pas pushtimit të Ukrainës nga Rusia në vitin 2022, me qëllim të nxjerrjes së dialogut dhe bashkëpunimit ndërmjet vendeve europiane, përfshirë këtu dhe ata jashtë Bashkimit Evropian, pa procedurat formale të zakonshme.
Në axhendë janë teme si forca e Ukrainës, situata e sigurisë në Evropë dhe mënyrat për ta bërë kontinentin më të sigurt. Një fokus i veçantë do të vendoset në aspekte të tjera të sigurisë evropiane, përfshirë sigurinë ekonomike, trafikun e drogës dhe migracionin.
Në këtë ngjarje do të marrin pjesë të gjithë krerët e shteteve dhe qeverive të BE-së, si dhe liderë nga vende jo-anëtare si Mbretëria e Bashkuar, Moldavia, Ukraina, Zvicra dhe Gjeorgjia. Rusia dhe Bjellorusia nuk janë ftuar në këtë takim.
Takimi i parë i Komunitetit Politik Evropian u mbajt në tetor të vitit 2022 në Pragë, ndërsa takimi i mëparshëm ishte zhvilluar në maj 2025 në Tiranë. Ky samit përfaqëson një hap të rëndësishëm në përpjekjet për të forcuar bashkëpunimin dhe komunikimin ndërmjet vendeve evropiane në një periudhë të trazuar politike dhe ushtarake.
