Më shumë se 80 media spanjolle kanë ngritur një padi kundër Meta, kompanisë që zotëron Facebook dhe Instagram, duke kërkuar rreth 550 milionë euro dëmshpërblim për modelin e saj të reklamimit. Gjyqi ka filluar në një gjykatë tregtare në Madrid dhe synon të trajtojë akuzat për konkurrencë të padrejtë në tregun e reklamave dixhitale.
Shoqata e Medias (AMI), e cila përfaqëson sektorin mediatik spanjoll, ka bërë këtë padi në dhjetor 2023 në Irlandë, vendi ku gjigandi amerikan ka selinë e tij evropiane. Drejtoresha e AMI-t, Irene Lanthako, theksoi gjatë një konference për mediat se ishte në rrezik mbijetesa e mediave, të cilat janë të kërcënuara nga veprimet grabitqare të Meta. Ajo kritikoi kompaninë për krijimin e profileve masive të sjelljes së përdoruesve të internetit dhe shitjen e reklamave pa pëlqimin e tyre, duke e cilësuar këtë veprim si të paligjshëm.
AMI akuzon Meta për shkelje të rregulloreve evropiane për mbrojtjen e të dhënave nga maji 2018 deri në korrik 2023, duke përdorur të dhënat e përdoruesve pa pëlqimin e tyre për të krijuar profile të personalizuara reklamash. Në kundërpërgjigjen e saj, Meta e quan këtë pretendim si të pabazuar dhe thekson se respekton të gjitha ligjet në fuqi. Ajo pohon se ofron mundësi dhe informacion transparent për përdoruesit për të kontrolluar përvojën e tyre në platforma.
Dëshmitarët e zgjedhur do të dëshmojnë sot, ndërsa raportet e ekspertëve dhe përfundimet e palëve do të paraqiten nesër. Grupi mediatik i përfaqësuar nga AMI përfshin emra të njohur si Prisa, Godo dhe Unidad Editorial. Përveç AMI-t, disa stacione radiotelevizive spanjolle kanë ngritur gjithashtu padi për të njëjtat arsye, duke kërkuar një kompensim prej 160 milionë eurosh.
Ky gjyq është një rast i rëndësishëm për industrinë e mediave, duke trajtuar ndikimin e platformave sociale në mënyrën se si funksionojnë tregjet e reklamave dhe nëse ato respektojnë ligjet e vendeve ku operojnë.
