Ish-ambasadorja amerikane në Shqipëri, Yuri Kim, ka nisur një punë të re pasi u shkarkua nga Departamenti amerikan i Shtetit. Në një postim në rrjetet sociale, Kim thotë se është e lumtur që ka nisur një pozicion të ri në ExxonMobil si drejtore ekzekutive.
Më 12 mars të vitit 2021, ministrja e Infrastrukturës, Belinda Balluku nënshkroi një marrëveshje me kompaninë Exxon Mobil e Excelerate Energy për vlerësimin e kuadrit rregullator teknik dhe komercial të futjes së gazit të lëngshëm natyror (LNG) në Shqipëri. Në atë kohë, Kim ishte ende ambasadore në Shqipëri.
Ndërkaq, kompania e lidhur me Exxon Mobil, Excelerate Energy qëndron pas termocentraleve anije në portin e Vlorës që i kanë zhvatur taksapaguesve shqiptarë dhjetëra milionë euro. ‘Piranjat’ kanë zbuluar se kompania që është kontraktuar nga Korporata Elektroenergjitike Shqiptare për të sjellë anijet që do të prodhojnë energji në Portin e Vlorës është offshore, e regjistruar në shtetin Delaware të Shteteve të Bashkuara të Amerikës.
Të dhënat e siguruara përmes dokumenteve zyrtare zbulojnë se në aplikimin e bërë nga kompania që ka firmosur kontratën me KESH është vetëm emri ‘Excelerate Energy’, por në fakt, në brendësi të ofertës rezultojnë në total tre shoqëri, dy prej të cilave janë të regjistruara në shtetin parajsë fiskale.
