Qeveria shqiptare, në kuadër të mandatit të saj të katërt, ka parashikuar rritjen e pagës mesatare për mësuesit në 1250 euro deri në vitin 2029, sipas programit të saj në fushën e arsimit. Suela Koçibellinj, aktiviste, thekson se megjithëse shifrat duken joshëse, duhet marrë parasysh ndikimi i inflacionit dhe çmimet që ndryshojnë gjatë katër viteve të ardhshme. Ajo sugjeron që rritja e pagave duhet të bazohet në një indeks.
Irsa Ruçi, eksperte arsimi, beson se paga më e mirë do të motivejë mësuesit të kontribuojnë më shumë në arsim. Ajo gjithashtu nënvizon nevojën për investime në transformimin digjital të shkollave dhe integrimin e inteligjencës artificiale në mësim, të cilat janë pjesë e strategjisë për Shqipërinë në BE deri në vitin 2030.
Një tjetër objektiv i qeverisë është pilotimi i ushqimit në institucionet arsimore në çdo bashki. Aktivistët shprehen skeptikë, duke kërkuar që ky plan të mos mbetet vetëm një premtim fushate, por të realizohet në praktikë për të gjithë vendin brenda katër viteve. Ekspertët gjithashtu theksojnë se nuk duhet të ketë diferencime midis shkollave për sa i përket ofrimit të ushqimit.
Qeveria synon gjithashtu të zgjasi orarin e qëndrimit të nxënësve në shkolla përmes një programi pas shkollor, duke ofruar më shumë siguri për prindërit. Ruçi ka shpreh shqetësime për cilësinë e qendrave private që ofrojnë aktivitete pas shkollore, duke thënë se ato nuk janë nën kontrollin e duhur.
Përveç tyre, fuqizimi i arsimit profesional është një tjetër fokus i programit “Rama 4”. Qeveria planifikon të dyfishojë numrin e të rinjve të regjistruar në shkollat profesionale, me një objektiv prej 35% të nxënësve të përgjithshëm. Investimet për ndërtimin e shkollave profesionale dhe instalimin e laboratorëve teknikë janë parashikuar të arrijnë në 60 milion euro, për të ofruar mundësi të reja edukimi për rinovimin e forcës punëtore.
