Mbrëmjen e kaluar, Amfiteatri Antik në Durrës ishte vendi i një aktiviteti të veçantë artistik, që shënoi përmbylljen e ekspozitës “Glance off It – Sguardo Laterale” nga fotografi italian Fabrizio Loiacono. Gjatë muajit shtator, Loiacono kishte ekspozuar një koleksion prej 16 fotografish abstrakte në Hamamin Mesjetar, të cilat theksonin bukurinë e objekteve të përditshme përmes një këndvështrimi të ri.
Fabrizio Loiacono shprehu emocionin e tij duke theksuar se instinkti është thelbi i gjithë krijimtarisë së tij. Ai ndjehej i vlerësuar për interesin e madh nga turistët dhe banorët durrsakë, të cilët ndoqën me pasion ekspozitën. Në një deklaratë, Loiacono premtoi se do të rikthehej së shpejti me një projekt të ri, duke aluduar për planin e tij për të vazhduar shkëmbimin kulturor mes Italisë dhe Shqipërisë.
Ekspozita, e cila bashkoi artin fotografik me muzike, përfshiu edhe tingujt magjepsës të violinës së Olen Çezarit. Ai shprehu shqetësimin për gjendjen e Amfiteatrit Antik, duke e cilësuar atë si një “perlë” që ende nuk është shfrytëzuar siç duhet për të tërhequr turistët. Çezari theksoi rëndësinë e ruajtjes dhe promovimit të këtij monumenti historik, i cili është një nga atraksionet më të rëndësishme të qytetit bregdetar.
Gjatë mbrëmjes, përveç ekspozitës vizuale, publiku pati mundësinë të përjetonte një atmosferë të veçantë që përçonte harmoni mes dy formave të artit, duke sjellë një eksperiencë ndryshe për durrsakët dhe të pranishmit italianë. Ky aktivitet, i organizuar në një ambient të tillë historik, shërbeu si një nxitje për vëmendjen ndaj trashëgimisë kulturore dhe artit në Durrës, duke tregon se si ky qytet mund të kombinojë traditën me modernitetin për të krijuar përvoja unike.
