Prokuroria e Posaçme (SPAK) ka zbardhur rrëmbimin, vrasjen dhe zhdukjen pa gjurmë të të riut nga Burreli, Klevis Lleshi, 21 vjeç, nga fshati Rukaj, në gusht të vitit 2020 në Burrel.
Eshtrat e të riut u gjetën në dhjetor të po atij viti në fshatin Shpërdhet të Kurbinit.
Janë lëshuar 4 urdhër-arreste, ku është ekzekutuar vetëm njëri prej tyre. Dyshohet se në rolin e urdhëruesit të kësaj ngjarje kriminale rezulton se ka qenë Aurel Hoxha, pronari i lokalit “Monopol” në zonën e “Myslym Shyrit” në Tiranë.
Ndërkohë, tre persona të tjerë kanë qenë bashkëpunëtorë të tij.
Kontrolle janë ushtruar gjithashtu edhe në zonën e Freskut në kryeqytet, në Kamëz, si dhe në Mamurras.
Dyshohet se Aurel Hoxha ka urdhëruar rrëmbimin, vrasjen dhe më pas zhdukjen e trupit të Klevis Lleshit për motive hakmarrje për vrasjen dhe më pas djegien e trupit të vëllait të tij Agim Hoxhës në vitin 2012 në Britaninë e Madhe.
Pas vrasjes së Agim Hoxhës, janë disa anëtarë të familjes Lleshi që janë ekzekutuar për hakmarrje, pasi Klevis Lleshit i kanë ekzekutuar edhe babain e tij, Xhavit Lleshi, xhaxhain e tij, Hajredin Lleshi.
Për tu theksuar sa I përket historisë së ekzekutimeve të families Lleshi, është ngjarja në burgun e sigurisë së lartë në Peqin, ku u ekzekutua edhe Arben Lleshi në 15 dhjetor të vitit 2023 nga Sokol Mjacaj.
Arben Lleshi ishte dënuar me burgim të përjetshëm si autor i vrasjes dhe më pas djegies së trupit të Agim Hoxhës në Britani.
Krimi në atë kohë dyshohet se ndodhi për shkak të prishjes së pazareve të drogës në Britani.
