Një rrjet i mirëorganizuar nga shtetas shqiptarë, i angazhuar në prodhimin dhe shpërndarjen e kanabisit në Britaninë e Bashkuar, është goditur nga autoritetet britanike. Pas një hetimi të gjatë, Policia e West Midlands dhe Njësia Rajonale për Krimin e Organizuar arrestuan dhe dënuan shtatë individë me një total prej gati 40 vitesh burg.
Hetimi, i cili filloi në maj të vitit 2022, zbuloi një strukturë kriminale të përkushtuar në kultivimin dhe shpërndarjen e kanabisit në atoçara të ndryshme të vendit. Ishin identifikuar 17 prona të shndërruara në shtëpi kanabisi, përfshirë qytete si Birmingham, Coventry, Leicester dhe Rotherham. Gjatë operacionit, autoritetet sekuestruan më shumë se 4,000 bimë kanabisi, të cilat kishin një vlerë të konsiderueshme në tregun e zi, si dhe dhjetëra mijëra paund para cash dhe pajisje për kultivimin e drogës.
Dënimet për indivitët ishin si më poshtë: Erikson Kararaj, 34 vjeç, mori 8 vite burg; Arben Sinjari, 48 vjeç, u dënua me 7 vite; Islam Toro, 31 vjeç, me 5 vite e 8 muaj; Klajdi Zyka, 28 vjeç, me 5 vite; Qemal Sakaj, 29 vjeç, me 4 vite e 6 muaj; Avdulla Delbashi, 31 vjeç, me 4 vite e 4 muaj; dhe Soni Gremshi, 37 vjeç, me 3 vite e 4 muaj. Sinjari dhe Kararaj identifikoheshin si drejtuesit kryesorë të grupit, ndërsa të tjerët merreshin me mirëmbajtjen e fermave dhe transportimin e kanabisit.
Një praktikë e paligjshme që grupi kishte përdorur ishte manipulimi i rrjetit elektrik për të siguruar energji për shtëpitë kanabisi, çka paraqiste një rrezik të madh për banorët përreth. Në shtëpinë e Sinjarit, hetuesit gjetën mesazhe dhe shënime që dokumentonin aktivitetin e paligjshëm.
Detektiv Sgt. Ryan Matthews theksoi se ky hetim kompleks ndihmoi në shkatërrimin e një rrjeti të nivelit të lartë të furnizimit me drogë dhe konfirmoi angazhimin e policisë për ta luftuar trafikun e drogës dhe për të sjellë përpara drejtësisë çdo individ të përfshirë.
