Këshilli i Ministrave i Shqipërisë ka propozuar kandidaturën e Adela Xhemalit, ish-zëvendësministre e Financave dhe Ekonomisë, si anëtare të Bordit të Autoritetit të Mbikëqyrjes Financiare (AMF) dhe Drejtoreshë e Përgjithshme Ekzekutive të këtij autoriteti. Ky vendim u miratua gjatë mbledhjes së fundit të qeverisë dhe pritet të kalojë për miratim në Kuvend sipas procedurave ligjore. Xhemali do të zëvendësojë Mimoza Kaçin, e cila është në fund të mandatit të saj.
Adela Xhemali ka një përvojë të gjerë në financat publike dhe ka shërbyer si zëvendësministre e Financave dhe Ekonomisë nga shkurt 2020 deri në mars 2025. Gjatë kësaj periudhe, ajo ka mbuluar fushat si makroekonomia, planifikimi dhe buxhetimi, menaxhimi i borxhit publik dhe i financave publike, si dhe proceset e integrimit evropian.
Përpara këtij posti, Xhemali ka mbajtur disa pozita të rëndësishme në administratën shtetërore, duke përfshirë atë të Drejtorit të Njësisë së Projekteve Kombëtare të Zhvillimit dhe Drejtorit të Përgjithshëm të Departamentit të Thesarit. Nga viti 2020 deri në 2025, ajo ka përfaqësuar Shqipërinë në institucione financiare ndërkombëtare si FMN dhe Grupi i Bankës Botërore, si dhe ka qenë anëtare e këshillave administrativë të disa bankave dhe institucioneve zhvillimore.
Përveç përvojës në sektorin publik, Xhemali ka një karrierë të shquar në sektorin privat, ku ka mbajtur pozita drejtuese në bankat kryesore të vendit, si American Bank of Albania dhe Intesa Sanpaolo Bank, për një periudhë 13 vjeçare. Ajo mban një Master Shkencor në Financë/Bankë nga Universiteti i Tiranës dhe një diplomë Bachelor në Administrim Biznesi nga Universiteti i Liverpool-it, si dhe ka ndjekur kurse në institucione prestigjioze në fushën e menaxhimit.
Emërimi i Xhemalit si drejtoreshë e përgjithshme e AMF pritet të sjellë një qasje të re dhe me përvojë në menaxhimin e mbikëqyrjes financiare në vend.
