Aktorja italiane Monica Bellucci dhe regjisori i njohur Tim Burton kanë njoftuar përfundimin e lidhjes së tyre përmes një deklarate të përbashkët. Në të thuhet se ata e kanë marrë këtë vendim me “respekt të madh dhe përkujdesje të ndërsjellë”.
Të dy u njohën në tetor të vitit 2022 gjatë Festivalit Lumière në Lion, Francë, ku Bellucci i dorëzoi Burton-it çmimin për arritje në karrierë. Pas atij momenti, çifti zhvilloi një lidhje të ngushtë, jo vetëm në jetën private, por po ashtu dhe në sferën profesionale. Kjo lidhje kulmoi me bashkëpunimin e tyre në filmin “Beetlejuice”, i cili u prezantua në Festivalin e Filmit në Venecia në vitin 2024. Në këtë vazhdim të komedisë së zezë të vitit 1988, Bellucci interpreton Delores, një krijesë që kërkon hakmarrje ndaj ish-bashkëshortit të saj Beetlejuice, rol që është rikthyer nga Michael Keaton. Filmi pati sukses të jashtëzakonshëm, duke arkëtuar gati 300 milionë dollarë në kinematë amerikane.
Në vitin 2023, Monica Bellucci konfirmoi lidhjen me Tim Burton pas disa muajsh spekulimesh, duke u shprehur se ishte shumë e lumtur që kishte takuar një burrë me një shpirt të mrekullueshëm. Ajo tregoi se ndiente një lidhje të veçantë dhe i vlerësonte thellësisht talentin e tij si regjisor. Megjithatë, së fundmi, ky kapitull i dashurisë ka marrë fund, duke nënkuptuar se, pavarësisht nga lidhja e fortë që ndanë, dyshja ka vendosur të ndahen për të ndjekur rrugë të reja në jetë.
Kjo ndarje ka lënë të papritur fansat e tyre, të cilët e kanë ndjekur me interes evolucionin e marrëdhënies së tyre. Tani, si Monica Bellucci ashtu edhe Tim Burton, do të vazhdojnë të përqendrohen në karrierat e tyre individuale, ndërsa kujtojnë momentet e bukura që ndanë gjatë bashkëpunimeve të tyre.
