Autoriteti i Mediave Audiovizive (AMA) ka organizuar Forumet e 12-të të Rrjetit të Rregullatorëve të Detit të Zi (BRAF), ku përfaqësues nga nëntë vende anëtare diskutuan për një çështje të rëndësishme: Gjuha e Urrejtjes në transmetimet audiovizive dhe platformat online. Në këtë forum ishin të pranishëm gjithashtu përfaqësues të lartë të Organizatës së Bashkëpunimit Ekonomik të Detit të Zi (BSEC), ku Amb. Dr. Merve Safa Kavakcı theksoi angazhimin e BSEC për projekte që nxisin inovacionin dhe qëndrueshmërinë, si Agjenda Ekonomike dhe “Blue Port Index”.
Kryetarja e AMA-s, Armela Krasniqi, e përshkroi luftën kundër Gjuhës së Urrejtjes si një prioritet të rëndësishëm, duke theksuar nevojën për shkëmbimin e eksperiencave mes vendeve përballë kësaj sfide globale. Ajo rikujtoi përparimin që Shqipëria ka bërë në rregullimin e tregut mediatik audioviziv, por gjithashtu theksoi se është ende një sfidë për të arritur ekuilibrin mes Lirisë së Shprehjes dhe mbrojtjes nga Gjuha e Urrejtjes.
Diskutimet në panelet e forumit përfshinin përfaqësues nga Azerbajxhani, Turqia, Greqia dhe Gjeorgjia, ku shqyrtuan pasojat dhe zgjidhjet ligjore dhe jo-ligjore ndaj Gjuhës së Urrejtjes. Nga ana tjetër, përfaqësuesit e Armenisë, Bullgarisë, Moldavisë dhe Serbisë u fokusuan në ndërgjegjësimin dhe edukimin e publikut për rregullimin e përmbajtjeve online në një perspektivë ndërkombëtare.
Lufta kundër Gjuhës së Urrejtjes mbetet gjithashtu një objektiv i rëndësishëm brenda punës së AMA-s, e cila ka ndërmarrë iniciativa ligjore dhe aktualisht po punon për transpozimin e akteve të rëndësishme europiane, si Akti i Lirisë së Medias dhe Akti i Shërbimeve Digjitale. Prioritet vijon të mbetet monitorimi dhe analiza e përmbajtjeve audiovizive, si dhe edukimi mediatik si një investim thelbësor për krijimin e një audience të informuar mirë.
