Presidenti rus Vladimir Putin deklaroi sot se mbi 700,000 ushtarë rusë aktualisht janë të angazhuar në vijën e parë të frontit në Ukrainë. Këto komente ai i bëri gjatë një takimi televiziv me ligjvënësit më të lartë të Rusisë. Në këtë kontekst, Putin theksoi se Rusia po ngadalësonte qëllimisht rritjen e saj ekonomike për të kontrolluar inflacionin dhe ruajtur stabilitetin makroekonomik. Ai shpjegoi këtë politikë si një “veprim të qëllimshëm” që synon të frenojë inflacionin.
Duke iu referuar një raporti të bankës qendrore të publikuar më herët në shtator, Putin nënvizoi se vendi kishte përjetuar dy tremujorë radhazi me rënie të produktit të brendshëm bruto, një situatë që përputhet me përkufizimin e recesionit teknik. Megjithatë, ai shprehu optimizëm, duke thënë se recesioni ishte ende larg dhe tregu i punës mbështeste këtë qëndrim, duke i dhënë një mbështetje të ekzekutivës së Bankës Qendrore, Elvira Nabiullina.
Nga ana tjetër, Shtetet e Bashkuara dhe Evropa, përmes një serie sanksionesh që kalojnë 25,000, kanë tentuar të dëmtojnë ekonominë ruse që prej fillimit të luftës në Ukrainë në vitin 2022 dhe aneksimit të Krimesë në vitin 2014. Megjithatë, përkundër këtyre sanksioneve, ekonomi ruse ishte rritur me 4.1% në vitin 2023 dhe pritej të rritet më shumë me 4.3% vitin e ardhshëm, duke u treguar kështu më e fortë se shumë vende të G7.
Putin gjithashtu sugjeroi se një taksë luksi mund të ishte një masë e arsyeshme, duke aluduar mbi mundësinë e rritjes së taksës mbi vlerën e shtuar (TVSH) për të menaxhuar deficitin buxhetor dhe ruajtur rezervat e vendit. Një veprim i tillë tregon për përpjekjet e qeverisë për të balancuar buxhetin e saj përballë sfidave ekonomike që ka shkaktuar konflikti në Ukrainë.
