Giovanni Padovani, një ish-futbollist dhe model 28-vjeçar, është dënuar me burgim të përjetshëm për vrasjen e brutalshme të ish-të dashurës së tij, Alessandra Matteuzzi. Vendimi u konfirmua nga Gjykata e Lartë e Kasacionit në Itali, e cila pranoi apelimin e Prokurorit të Përgjithshëm dhe konfirmoi vendimin e mëparshëm të gjykatës së Bolonjës.
Ngjarja tragjike ndodhi më 23 gusht 2022, kur Padovani e zuri në pritë 56-vjeçaren duke e goditur me grushte, shqelma dhe më pas me një çekiç. Kjo vrasje shkaktoi një tronditje të madhe në opinionin publik italian dhe u shndërrua në një simbol të dhunës ndaj grave nga ish-partnerët, në një kontekst të rritur të alarmit për shoqërinë italiane.
Avokatët e familjes së viktimës, Chiara Rinaldi dhe Antonio Petroncini, shprehën pas vendimit rëndësinë e drejtësisë: “Alessandra më në fund ka marrë drejtësi. Giovanni Padovani është një vrasës, një përndjekës dhe një njeri me mendje të shëndoshë.” Sipas tyre, ai përpiqej të kontrollonte dhe posedonte Alessandrën deri në çastin kur ajo vendosi të rebelonte kundër dhunës, duke rezultuar në vrasjen e saj brutale.
Në një mesazh emocionues, avokatët e përmendën se në një pasdite të vonë shtatori, duke parë qiellin, ndiejë se “Sandra” është atje diku, duke luajtur me qenin e saj, Venny, e lirë të buzëqeshë dhe të jetë një grua.
Rasti i Alessandra Matteuzzi ka rindezur debate në lidhje me nevojën për reforma më të ashpra ligjore dhe mbrojtje më të forta për gratë që raportojnë përndjekje apo dhunë nga ish-partnerët. Pavarësisht ankesave të mëparshme të Alessandrës, ajo nuk arriti të mbrohej në kohë nga agresori i saj, i cili përfundimisht i mori jetën, duke rikthyer në vëmendje nevojën për veprime më të efektshme në mbrojtje të viktimave të dhunës gjinore.
