Autoriteti Kombëtar për Sigurinë Kibernetike (AKSK) ka tërhequr vëmendjen e qytetarëve për një rast të ri mashtrimi përmes SMS, i njohur si “smishing”. Ky mesazh përmban informacion të rremë për gjoba të pretenduara për shkelje të rregullave të qarkullimit rrugor dhe përfshin një link të dyshimtë që drejton në një faqe mashtruese, ku qytetarët inkurajohen të kryejnë pagesa online.
AKSK thekson se ky mesazh nuk është nga ndonjë institucion të njohur shtetëror dhe këshillon qytetarët që ta injorojnë atë. Asnjë informacion personal nuk duhet ndarë, as të klikojnë në linkun e dërguar. Në përpjekje për t’i mbrojtur qytetarët dhe për të parandaluar dëme të mundshme, AKSK ka ndërmarrë masa për të bllokuar faqen e mashtruesve.
Institucioni i sigurisë kibernetike nxjerr një sërë rekomandimesh për qytetarët për të shmangur rreziqet e tilla. Së pari, ata inkurajohen të mos hapin linqe që duken të dyshimta, qoftë nga SMS apo email-e që nuk janë zyrtare. Përveç kësaj, qytetarët duhet të kenë kujdes dhe të mos kryejnë asnjë pagesë përmes faqeve që nuk janë me domen zyrtar.
Në rast të hasjes së mesazheve të tilla, AKSK kërkon që qytetarët të raportojnë menjëherë për situatën, në mënyrë që të merren masa të shpejta për bllokimin e këtyre aktiviteteve të paligjshme. Kjo është një përpjekje për të garantuar sigurinë e informacionit personal dhe për të mbrojtur qytetarët nga potencialet e mashtrimit që po bëhen gjithnjë e më të zakonshme në epokën digjitale.
Për t’u mbrojtur, qytetarët duhet të tregojnë kujdes dhe të informohen mbi mënyrat e reja të mashtrimit, për të siguruar që të mos bien viktima të kësaj forme kriminale moderne. Transparenca dhe edukimi për sigurinë kibernetike janë kyçe në këto raste.
