Në një operacion të gjerë të policisë greke, i koordinuar me prokurorinë evropiane, është shkatërruar një linjë ndërkombëtare trafiku mallrash me përmasa të mëdha. Operacioni ka rezultuar në sekuestrimin e 2,435 kontejnerëve në portin e Pireut, ndërsa 350 të tjerë ende priten të verifikohen nga autoritetet. Ky është operacioni më i madh i këtij lloji në historinë e Bashkimit Evropian, duke shkaktuar një dëm ekonomik prej mbi 800 milionë eurosh për vendet evropiane për shkak të evazionit të taksave të importit dhe TVSH-së.
Vlera e mallrave të sekuestruar shkon nga 250 deri në 300 milionë euro, me 500 kontejnerë që përmbajnë skuterë elektrikë dhe të tjerë që dyshohet se kanë pajisje elektrike, veshje, këpucë dhe mallra të ndryshme industriale. Gjithashtu, ka dyshime se disa nga kontejnerët përmbajnë mallra kontrabandë si cigare dhe produkte me markë të falsifikuara.
Sipas prokurorisë evropiane, organizata kriminale ka përdorur portin e Pireut dhe terminalin e COSCO-s, ku të gjithë kontejnerët e sekuestruar janë pronë e kësaj kompanie, e cila njihet si pronë e shtetit kinez. Kjo ngre shqetësime për mundësinë e një skandali të përmasave shtetërore, me përfshirjen e eksponentëve qeveritarë kinezë.
Ngarkesat, që deklaroheshin ndryshe nga realiteti, ishin zhdoganoheshin me kode të ndryshme, duke lejuar evazion që llogaritet në miliona euro. Përfituesit kryesorë të kësaj kontrabande janë kompani kineze që operojnë në Evropë, me përfshirjen e mundshme të vendeve të Ballkanit. Mes kontejnerëve të sekuestruar, ka shumë me destinacion për Shqipërinë, Maqedoninë e Veriut dhe Kosovën.
Deritani, janë arrestuar dy doganierë dhe pesë agjentë doganorë, ndërsa priten akuzat për disa subjekte tregtare të përfshira në këtë skandal të madh të trafikut të mallrave. Operacioni është ende në vazhdim dhe zbulime të reja priten nga autoritetet.
