Ushtria izraelite njofton se mbi 250,000 persona janë larguar nga Qyteti i Gazës në javët e fundit, pas intensifikimit të sulmeve të saj ndaj këtij territori. Përfaqësuesi i ushtrisë, Avichay Adraee, tha se evakuimi është bërë për të siguruar jetën e qytetarëve. Kombet e Bashkuara konfirmojnë se rreth 1 milion palestinezë jetojnë në dhe përreth Gazës.
Më 13 shtator, ushtria izraelite shpërndau pamflete duke i bërë thirrje banorëve të qarqeve perëndimore të evakuohen, duke njoftuar për operacione të rënda ushtarake për të shkatërruar Hamasin. Izraeli ka paralajmëruar një forcim të mëtejshëm të operacioneve të tij, duke u përballur dje me presion të madh ndërkombëtar që të ndalojë ofensivën. Shteti hebre thekson se Gazza është një nga bastionet e fundit të Hamasit dhe se operacionet e tij kanë si qëllim eliminimin e këtij grupi, i cili është shpallur terroriste nga SHBA dhe BE.
Gjatë kësaj periudhe, ushtria izraelite ka sulmuar ndërtesa shumëkatëshe në Gaza, duke pretenduar se ato përdoren nga Hamas. OKB-ja dhe organizmat ndërkombëtarë kanë shprehur shqetësim se ofensiva do të përkeqësojë një situatë humanitare tashmë shumë të vështirë në rajon, ku është shpallur gjendje urie.
Raportet nga agjencia e mbrojtjes civile në Gaza theksojnë se vetëm gjatë një mëngjesi të fundit, pesë persona kanë humbur jetën nga sulmet izraelite. Një ditë më parë, shifra e viktimave kishte arritur në 50 në të gjithë Rripin e Gazës. Lufta ka shpërthyer pas sulmit të Hamasit më 7 tetor, i cili rezultoi në vrasjen e rreth 1,200 izraelitëve dhe rrëmbimin e 251 të tjerëve. Si pasojë e kundërsulmeve izraelite, të dhënat e Ministrisë së Shëndetësisë në Gaza flasin për mbi 64,000 viktima palestineze, shifra që pranohen si të besueshme edhe nga Kombet e Bashkuara.
