Liqeni Artificial i Tiranës, i njohur si “mushkëria e gjelbër” e qytetit, po përballet me një situatë alarmante të ndotjes nga shkarkimet e ujërave të zeza nga bizneset që operojnë në zonë. Kjo çështje është theksuar në një auditim të Kontrollit të Lartë të Shtetit (KLSH), që ka zbuluar se institucionet përgjegjëse janë informuar për ndotjen, por ende nuk kanë marrë masa konkrete për ta adresuar këtë problem.
Sipas auditimit, që në tetor 2024, janë identifikuar shkarkime të ujërave të ndotura që nuk janë trajtuar, por përveç shkresave, nuk ka pasur veprime të dukshme për të ndaluar këtë praktikë. KLSH ka theksuar se bashkëpunimi ndërinstitucional për zgjidhjen e situatës ka dështuar, një konstatim që është pranuar edhe nga Agjencia e Parqeve dhe Rekreacionit (APR). Edhe pse janë realizuar tendera për pastrimin e liqenit, këto iniciativa nuk ishin të fokusuara në menaxhimin dhe reduktimin e ujërave të zeza.
Nga 2021 deri 2024, APR ka shpërdoruar mbi 10.6 milionë lekë për pastrimin e liqenit, por ky pastrim është bërë kryesisht në formë mekanike, si heqja e plastikave dhe vegjetacionit të tepruar, pa adresuar ndotësit kryesorë të ujit. Liqeni nuk ka një sistem qarkullimi të ujit dhe mbështetet vetëm në prurjen e shirave, gjë që e bën më të vështirë menaxhimin e tij.
Mungesa e një rrjeti kanalizimesh në park e ka përkeqësuar edhe më tej situatën, duke detyruar subjektet private që të përdorin zgjidhje individuale si gropat septike, të cilat nuk monitorohen nga asnjë institucioni. Kjo situatë nuk është vetëm një problem mjedisor, por rrezikon po ashtu shëndetin publik, për shkak të pranisë së ujërave të ndotura. Kërkohet një angazhim më serioz dhe veprime të menjëhershme nga autoritetet për të zgjidhur këtë skenar shqetësues dhe për të mbrojtur pasuritë natyrore të Tiranës.
