Presidenti i përkohshëm i Sirisë, Ahmed al-Sharaa, ka konfirmuar se janë duke u zhvilluar negociata për arritjen e një marrëveshjeje sigurie me Izraelin. Këto biseda po ndodhin pas rënies të qeverisë së Bashar al-Assad në dhjetor të vitit të kaluar dhe ndodhen në mes të tensioneve historike midis dy vendeve, të cilat janë zyrtarisht në luftë që nga 1948.
Pas Luftës së Jom Kipur në 1973, Siria dhe Izraeli arritën një marrëveshje për ndalimin e armiqësive, e cila krijoi një zonë të sigurt në Lartësitë e Golanit, e mbikëqyrur nga Kombet e Bashkuara. Al-Sharaa tha se Izraeli beson se Siria është tërhequr nga marrëveshja pas rënies së regjimit të Assadit, megjithatë, Siria ka shprehur vazhdimisht përkushtim ndaj këtij pakti.
“Negociatat për një marrëveshje sigurie po zhvillohen me qëllim që Izraeli të rikthehet në pozitat e tij para 8 dhjetorit,” deklaroi al-Sharaa, duke theksuar se bisedimet ende nuk kanë përfunduar. Ai gjithashtu nënvizoi se mbrojtja e druzëve – një minoritet të vogël por me ndikim – është një prioritet.
Muajin e kaluar, dy palët zhvilluan bisedime të drejtpërdrejta, të ndërmjetësuara nga Shtetet e Bashkuara. Lartësitë e Golanit, të okupuara nga Izraeli që nga 1967 dhe të aneksuara në 1981, përbëjnë një pikë kryesore kontestuese mes dy vendeve, ndërsa aneksimi izraelit nuk njihet ndërkombëtarisht.
Pas rënies së Assadit, Izraeli ka dislokuar trupa shtesë në Golan, duke intensifikuar sulmet ajrore në Siri me arsyetimin se po përpiqet të pengojë që armët siriane të bien në duar të ekstremistëve. Së fundmi, Izraeli ka bombarduar edhe jugun e Sirisë dhe Damaskun për të mbrojtur minoritetin druz, pas shpërthimit të dhunës në provincën Suveidë, një bastion i këtij grupi fetar. Druzët, që ndjekin një degë të Islamit, janë një grup kyç në rajon, që përfshin Sirinë, Izraelin dhe Libanin.
