Giorgio Armani, ikona e modës italiane, la pas dy testamente të dorëshkruara, që do të përcaktojnë ndarjen e pasurisë së tij të konsiderueshme, që varion mes 11 dhe 13 miliardë eurove. Pasuria e tij përfshin prona të shumta luksoze në destinacione prestigjoze si Antigua, Nju Jork dhe Saint-Tropez, një apartament në Nju Jork dhe jahte të shtrenjta, si dhe aksione në Giorgio Armani SpA dhe në kompani të tjera si EssilorLuxottica. Testamentet u hapën zyrtarisht më 9 shtator nga noteria Elena Terrenghi.
Testamenti i parë daton 15 mars 2025, ndërsa i dyti nga 5 prilli, duke sugjeruar se ky i fundit mund të kompletojë ose ndryshojë të parin. Me ndarjen e pasurisë, Armani, që u nda nga jeta më 4 shtator në moshën 91 vjeçare, do të kishte mundësi të vendoste për fatin e pasurisë pa kufizimet që ligji parashikon për trashëgimtarët e drejtpërdrejtë, pasi ai nuk kishte fëmijë. Ndër të afërmit e tij janë motra Rosanna, nipi Andrea dhe mbesat Silvana dhe Roberta.
Ai shprehu nga testamenti dëshirën për të ruajtur stilin dhe identitetin e markës, si dhe për të mbajtur selinë në Itali, duke mos lejuar publikimin e saj në bursë për pesë vitet e ardhshme. Ka mundësi që Fondacioni Armani, i krijuar nga vetë stilisti, të marrë përsipër drejtimin e kompanisë, duke garantuar stabilitet dhe vazhdimësi në një kohë kur industria e modës është në transformim.
Java e Modës në Milano që zhvillohet më 23-29 shtator do t’i kushtohet kujtimit të Armanit, me presidentin e Dhomës Italiane të Modës, Carlo Capasa, që përmendi rëndësinë e trashëgimisë së tij në këtë industri. Kryebashkiaku i Milanos, Giuseppe Sala, njoftoi gjithashtu se emri i stilistit do të regjistrohet në Famedio, duke e nderuar si një figurë që ka kontribuar në ndërtimin e reputacionit të qytetit përmes kreativitetit dhe stilit të tij të veçantë.
