Protestat e dhunshme në Nepal kanë arritur një shkallë të jashtëzakonshme pas publikimit të një videoje që tregon ministrin e Financave duke u ndjekur dhe me forcë të hidhet në lumë nga turmat e zemëruara. Pamjet që po qarkullojnë masivisht në rrjetet sociale, e tregojnë ministrin me rroba të shqyera, duke ikur përmes një përroi, ndërsa protestuesit brohorasin nga bregu, duke simbolizuar zemërimin e thellë ndaj klasës politike nepaleze.
E gjithë kjo ka nisur si rezultat i vendimit të qeverisë për të bllokuar disa nga platformat më të njohura sociale, si Facebook, X (Twitter) dhe YouTube. Ky veprim është parë si një akt censurimi dhe një sulm ndaj lirive personale, veçanërisht nga një brez i ri i rritur me teknologji dhe lidhje globale. Protestat shpërthyen në qendër të Kathmandu, duke grumbulluar mijëra qytetarë, kryesisht të rinj, të cilët kërkonin të drejtat e tyre.
Forcat e sigurisë reaguan me dhunë, duke përdorur gaz lotsjellës, plumba gome dhe duke vendosur një ndalim qarkullimi në disa pjesë të qytetit. Sipas raporteve, deri tani ka pasur të paktën 22 viktima pas përplasjeve mes protestuesve dhe forcave policore. Dëme të tjera janë shkaktuar gjatë protestave, përfshirë djegien e shtëpisë së ish-kryeministrit Jhalanath Khanal dhe vdekjen e bashkëshortes së tij.
Në mes të këtij kaosi, Kryeministri KP Sharma Oli shpalli dorëheqjen, duke theksuar se vendimi i tij “do të hapte rrugën për një zgjidhje politike kushtetuese.” Sipas gazetës Kathmandu Post, protestat reflektojnë një zemërim më të gjerë ndaj korrupsionit, mungesës së mundësive ekonomike dhe humbjes së besimit tek politikanët.
Protestuesit, sidomos ata nga gjenerata Z, shprehin se liria digjitale për ta përbën themelin e lirisë personale, duke e ndjerë ndalimin e rrjeteve sociale si një sulm ndaj zërit të një brezi të tërë që aspiron për një të ardhme më të mirë në Nepal.
