Ministrja e Arsimit dhe Sportit, Ogerta Manastirliu, së bashku me Kryetaren e Bashkisë së Durrësit, Emiriana Sako, vizituan shkollën “Benardina Qerraxhia”, e cila ka përfituar nga një investim të madh nga Qeveria shqiptare dhe Bashkimi Europian, në kuadër të programit EU4Schools, zbatuar nga UNDP dhe Bashkia Durrës. Ky institucion me traditë 55-vjeçare në përgatitjen e sportistëve elitarë ka kaluar në një transformim, duke ofruar kushte moderne dhe një model për shkollat sportive në vend.
Ministrja Manastirliu theksoi se tashmë viti shkollor ka filluar me shkolla të reja dhe të rehabilituara, duke vlerësuar punën e bashkive për mirëmbajtjen e infrastrukturës arsimore. Ajo e përshkroi kompleksin edukativ “Benardina Qerraxhia” si një veprimtari madhore që ofron standarde europiane për zhvillimin e nxënësve dhe përgatitjen e sportistëve elitarë. Kompleksi ka qenë i rikonstruktuar dhe zgjeruar, duke përfshirë klasa, laboratorë, bibliotekë, dhomë shërbimi shëndetësor dhe terrene sportive si palestra të reja për aktivitete të ndryshme të sporteve.
Pjesë e projektit është ndërtimi i një fushe stërvitore për futboll, pistë atletike dhe komoditete për 150 nxënës në konvikt. Gjithashtu, shkolla merr pjesë në projektin “Elite Youth Player Development Academy” të FSHF-së, i cili synon zhvillimin e talenteve të rinj përmes trajnimeve të standardeve ndërkombëtare. Për herë të parë, është zgjeruar cikli i edukimit sportiv në shkollë nga klasa e VI deri në klasën e IX, duke njohur rëndësinë e identifikimit dhe trajtimit të talenteve që në moshë të hershme.
Ministrja Manastirliu deklaroi se ky është një hapi rëndësishëm për motivimin e nxënësve të angazhohen në shkollat sportive dhe ato artistike, duke theksuar nevojën për shkolla me orientim shkencor dhe inovator. Këtë vit, në të gjithë vendin janë hapur 30 shkolla të reja ose të rehabilituara, ndërsa 40 të tjera janë në ndërtim e sipër. Ajo nënvizoi se ky investim në infrastrukturë shoqërohet gjithashtu me përmirësimin e standardeve të mësimdhënies dhe trajnimin e mësuesve.
Viti shkollor në Kompleksin Edukativ “Benardina Qerraxhia” ka nisur me 226 nxënës të regjistruar në disiplinat sportive, si futboll, volejboll, basketboll, atletikë dhe peshëngritje, si dhe me hapjen e ciklit arsimor 9-vjeçar. Ky është një zhvillim i rëndësishëm që përfaqëson një avancim të dukshëm në arsimimin dhe trajnimin sportiv në Shqipëri.
