Mëngjesin e ditës së sotme qyteti i Shkodrës u trondit sërish. I riu Ragip Gila, 29-vjeç, qëlloi me breshëri plumbash drejt ambienteve të një lokali ku Erogen Vaso dhe miku i tij, Armando Pali ishin duke konsumuar kafen e mëngjesit.
Në një ditë si kjo e hënë, kur disa metra larg lokalit ndodhet shkolla “Kolë Idromeno”, e cila këtë mëngjes gumëzhinte nga zërat e fëmijëve që u rikthyen në klasat e tyre, ambulanca dhe policia zbarkuan në zonë.
Si pasojë viktimë e këtij atentati mbeti Armando Pali dhe Liridon Kraja, ndërkohë i plagosur mbeti Erogen Vaso dhe kamarieria e lokalit, 25-vjeçarja Meri Kaceri.
Autori i kësaj tragjedie, Ragip Gila rezulton një emër i njohur për drejtësinë shqiptare pasi në muajin mars ai kishte lënë qelinë.
Siç shihet dhe në vendimin që mban vulën dhe firmën e gjyqtarit Albert Keraj, më 4 mars 2025, Gjykata e Shkodrës shpalli vendimin ndaj Ragip Gilës, i akuzuar për veprën penale të prodhimit dhe shitjes së narkotikëve.
Në bazë të vendimit, Gila u deklarua fajtor dhe fillimisht u dënua me 5 vite burg, por duke u bazuar në nenin 406 të Kodit të Procedurës Penale, dënimi iu ul me një të tretën, duke u përcaktuar në 3 vite e 4 muaj burgim.
Megjithatë, në zbatim të nenit 59 të Kodit Penal, gjykata urdhëroi pezullimin e ekzekutimit të dënimit me burgim, duke e vendosur të pandehurin në një periudhë prove prej 5 vitesh. Gjatë kësaj kohe, sipas vendimit të marrë nga gjykatësi Keraj, i riu ishte i detyruar që të mos kryejë asnjë vepër penale dhe të mbante kontakte të rregullat me Degën e Shërbimit të Provës në Shkodër.
Gjykata gjithashtu urdhëroi që Gila të mos zotërojë dhe të mos përdorë armë zjarri pa leje për një periudhë prej 1 viti. Po ashtu, u vendos shuarja e masës së sigurisë së arrestit me burg, duke u urdhëruar lirimi i menjëhershëm i të pandehurit nga qelia, nëse nuk mbahet për ndonjë arsye tjetër.
Theksojmë se atentati i sotëm vjen vetëm tre ditë pas vrasjes së 34-vjeçarit Kristian Kola, vetëm disa metra larg vendit ku dhe ndodhi ngjarja e sotme. Burime për mediat bëjnë me dije se grupi hetimor dyshon se Gila të ketë “gisht” edhe në atentatin e të riut Kola.
Nga analizat e kamerave dhe hetimeve paraprake, thuhet se autori i dy ngjarjeve ka tipare fizike të ngjashme dhe përdori të njëjtën mënyrë ekzekutimi.
Hetuesit dyshojnë se për shkak të ngjashmërisë fizike dhe mënyrës së kryerjes së atentatit, ku hapet zjarr nga një motor, dyshohet se kemi të bëjmë me të njëjtin autor.
Ndërkohë sa i përket itinerarit që 29-vjeçari ndoqi ditën e sotme mësohet se pas atentatit ai braktisi motomjetin e tij dhe u largua rreth 300 metra në këmbë.
Më pas ai i vendosi armën një qytetari duke i rrëmbyer automjetin e tij. Me makinën e grabitur dhe skafandrë në kokë brenda automjetit, i riu tentoi që të largohet deri në zonën e Sarreqit ku dhe u përfshi në një aksident.
Pas aksidentit ai braktisi automjetin tip “BMW” dhe u largua me vrap, ndërkohë që efektivët ishin në ndjekje të tij duke arritur ta neutralizojnë dhe arrestojnë poshtë shinave të trenit në shtratin e lumit Kir.
“Rreth orës 08:50, në lagjen “Qemal Stafa”, në ambientet e jashtme të një lokali, dyshohet se shtetasi R. G. ka qëlluar me armë zjarri dhe si pasojë janë plagosur shtetasi E. V. (B.), 43 vjeç, i cili ndodhet nën kujdesin e mjekëve, si dhe shtetasja M. K., 25 vjeçe, e cila është dëmtuar lehtë.
Gjithashtu, si pasojë e të shtënave, ka humbur jetën në vendngjarje shtetasi A. P., ndërsa në Spitalin Rajonal Shkodër ka ndërruar jetë edhe shtetasi L. K. (L.), 31 vjeç.
Shërbimet e Policisë kanë shkuar menjëherë në vendngjarje dhe janë vënë në ndjekje të autorit. Pas disa minutash ndjekjeje, bënë të mundur kapjen e tij dhe sekuestruan një armë zjarri automatike.
Ndërkaq, grupi hetimor, nën drejtimin e Prokurorisë, vijon punën për zbardhjen e rrethanave të ngjarjes“, njoftoi Policia më herët.
