Një burrë 51-vjeçar ka rënë në pranga nga policia çeke pasi u kap duke drejtuar një makinë garash të tipit GP2 në një autostradë pranë Pragës, një incident që kishte ngjallur shqetësim te autoritetet që prej vitit 2019. Policia e Republikës Çeke identifikoi dhe ndali të dyshuarin pas një incident të fundit në autostradën D4, ku makina e kuqe, e ngjashme me një Ferrari Formula 1, u filmua duke ecur me shpejtësi dhe duke ndaluar për karburant.
Duke u nisur nga pamjet, makina u gjurmua deri në një pronë private në fshatin Buk, rreth 60 km nga Praha. Policët ndërhynë me dhjetëra mjete dhe një helikopter për të arrestuar shoferin. Ai fillimisht refuzoi të dilte nga automjeti, duke debatuar me agjentët për hyrjen në pronën e tij. Pas një kohë, ai pranoi të dorëzohej, ende i veshur me helmetën dhe uniformën e tij të garave. U shoqërua në stacionin policor, por nuk dha asnjë deklaratë rreth incidentit.
Ky arrest shënon përfundimin e një hetimi që kishte zgjatur më shumë se katër vjet. Që nga viti 2019, makina e tij ishte parë disa herë në autostrada, por shkak i helmetës së shoferit, autoritetet kishin dështuar të identifikonin personin në timon. Më herët, policia kishte lokalizuar automjetin dhe kishte marrë në pyetje pronarin, i cili kishte mohuar se e kishte drejtuar atë në rrugët publike.
Çështja mbetet e paqartë nëse i arrestuari është po ai person që ishte marrë në pyetje më parë, ndërsa autoritetet tani po punojnë për të sqaruar situatën. Ky incident ka ngritur pyetje mbi sigurinë në rrugë dhe përdorimin e makinave të tilla në ambiente publike, duke theksuar rëndësinë e monitorimit të sjelljes së shoferëve, veçanërisht kur bëhet fjalë për automjete me performanca të larta.
