Kryeministri japonez Shigeru Ishiba ka dhënë dorëheqjen pas më pak se një viti në detyrë, duke përballuar dy humbje të rëndësishme zgjedhore që kanë lënë Partinë Liberal Demokrate (PLD) pa shumicë në Parlament për herë të parë në 15 vjet. Dorëheqja e tij ndodhi në një moment të ndjeshëm për Japoninë, e cila po përballet me krizë ekonomike dhe pasiguri në rajon.
Ishiba njoftoi tërheqjen e tij një ditë para një votimi të mundshëm të brendshëm brenda PLD-së, i cili mund ta kishte detyruar atë të largohej nga posti. Gjatë mandatit të tij të shkurtër, i nisur në tetor 2024, ai nuk arriti të kërkonte besimin e publikut, teksa inflacioni dhe kriza e kostos së jetesës kanë goditur rëndë ekonominë, duke përfshirë dyfishimin e çmimeve të orizit.
Ndërsa trysnia politike rritej, Ishiba kishte refuzuar të dorëhiqej derisa të përfundonin negociatat me Shtetet e Bashkuara për tarifat ndaj eksporteve japoneze. Ai theksoi rëndësinë e këtyre negociatave, duke i konsideruar si një krizë kombëtare. Marrëveshja e arritur për lehtësimin e tarifave nga administrata e Presidentit Donald Trump duket se ishte pika që e shtyu atë drejt dorëheqjes.
Tensionet brenda partisë gjithashtu kontribuan në pakënaqësinë ndaj tij, përfshirë kritika për emërimin e vetëm dy grave në kabinet dhe akuza për shpërndarje të dhuratave të shtrenjta për anëtarët e partisë. Pas largimit të Ishibës, PLD do të organizojë zgjedhje të brendshme për të emëruar një udhëheqës të ri, i cili do të miratohet nga parlamenti si kryeministër.
Dorëheqja e Ishibës sjell një periudhë të pasigurt politike për Japoninë, e cila është ekonomia e katërt më e madhe në botë dhe një aleate kyçe e SHBA-së. Në këtë kohë, tensionet me Kinën dhe sfidat rajonale po rriten, duke e bërë situatën akoma më delikate për vendin.
