Për herë të parë që nga fillimi i agresionit rus, një nga ndërtesat kryesore të qeverisë ukrainase në qendër të Kievit është goditur drejtpërdrejt nga një sulm ajror rus gjatë natës. Kryeministrja Yulia Svyrydenko konfirmoi përmes një postimi në Facebook se godina qeveritare ka pësuar dëme të konsiderueshme në çati dhe katet e sipërme. Ekipet e shpëtimit po punojnë për të shuar flakët. Kryetari i Bashkisë, Vitaliy Klitschko, njoftoi se zjarri ka shpërthyer si pasojë e një sulmi të dyshuar me dron dhe se zjarrfikësit po operonin në vendngjarje.
Përveç godinës qeveritare, janë goditur gjithashtu një magazinë, një ndërtese banimi 16-katëshe dhe një tjetër 4-katëshe në zona të tjera të kryeqytetit. Ky sulm shënon një rritje të përshkallëzimit të strategjisë ruse, duke e bërë këtë sulm të parë të dokumentuar mbi ndërtesën e kabinetit qeveritar. Sipas raportimeve të forcave ajrore ukrainase, gjatë sulmit janë lëshuar mbi 800 dronë dhe raketa, duke vendosur një rekord të ri të sulmeve gjatë natës.
Kryeministrja Svyrydenko e cilësoi këtë si një akt terrori ndaj popullit ukrainas. Ajo deklaroi se armiku po terrorizon popullin përditë, në çdo cep të vendit. Gazetarët në terren raportuan për re të madhe tymi pas Maidanit, e ndjekur nga shpërthime të fuqishme. Qendra e Kievit zakonisht është e mbrojtur mirë nga mbrojtja ajrore, por këtë herë, numri i madh i sulmeve ka tejkaluar kapacitetet mbrojtëse.
Në sfondin e këtyre ngjarjeve, tensionet ndërkombëtare po rriten gjithashtu. Presidenti rus Vladimir Putin ka hedhur poshtë idenë e vendosjes së një “forcë garancie sigurie” nga Perëndimi në Ukrainë, duke paralajmëruar se çdo trupë e huaj do të trajtohet si shënjestër legjitime. Kjo ndodhi pas një samiti të presidentit francez Emmanuel Macron me aleatët, ku ai propozoi një mision për të parandaluar agresionet e reja, pa marrëdhënie të drejtpërdrejta me Rusinë. Zëdhënësi i Putinit theksoi se çdo forcë e huaj përbën një kërcënim për Rusinë.
