Një tragjedi e madhe ka ndodhur në Lisbonë kur tramvaji “Elevador da Glória” doli nga shinat dhe u përplas, duke shkaktuar vdekjen e 17 personave dhe plagosjen e 20 të tjerë, nga të cilët 5 janë në gjendje kritike. Incidenti ndodhi në një rrugë të pjerrët, dhe autoritetet po punojnë që të identifikojnë pasagjerët dhe të zbulojnë shkaqet e përplasjes.
Fokusi i hetimeve është te kablloja që mundëson funksionimin e sistemit të kundërpeshës të tramvajit, i cili ka funksionuar që nga viti 1914, fillimisht me energji uji dhe më pas me avull e tani me elektricitet. Sidoqoftë, pyetja kryesore mbetet sesi tramvaji arriti të dilte nga shinat dhe pse sistemi i frenimit nuk e ndali zbritjen e tij me shpejtësi. Dëshmitarët kanë përshkruar momentin e përplasjes si shumë të frikshëm, duke theksuar se tramvaji po ecte me shpejtësi të madhe dhe goditi një ndërtesë.
SIC Notícias raportoi se ekspertët dyshojnë se ngecja e frenave mund të ishte shkaku kryesor i aksidentit, ndërsa inspektorët po kërkojnë ndihmën e autoriteteve për të rritur kontrollet mbi sigurinë. Një elektricist ka shprehur nevojën për më shumë inspektime dhe trajnime në fushën e sigurisë, duke insistuar se duhet një hetim i thelluar për të kuptuar se çfarë shkoi keq.
Qeveria portugeze shpalli sot një ditë zie kombëtare për të nderuar viktimat, e shumë nga ta mendohet se ishin turistë. Tramvaji, i njohur si një atraksion turistik, kishte kapacitet për rreth 40 pasagjerë, por në momentin e aksidentit nuk ishte plotësisht i zënë. Ky incident është unik, pasi një aksident i tillë me tramvajin elektrik nuk kishte ndodhur kurrë më parë në Lisbonë, duke krijuar shqetësim të madh për sigurinë e transportit publik në qytet.
