Në një vizitë zyrtare në Pekin, Presidenti rus Vladimir Putin vlerësoi marrëdhëniet me Kinën si “në një nivel të lartë të paparë”. Gjatë kësaj vizite u nënshkrua një marrëveshje e rëndësishme për ndërtimin e tubacionit të gazit “Fuqia e Siberisë-2”, që do të lidhi Rusinë me Kinën përmes Mongolisë. Ky projekt strategjik do të ndihmojë në transportimin e deri në 50 miliardë metra kub gaz në vit nga Rusia në veri të Kinës.
Pas një takimi mes Putinit, Presidentit kinez Xi Jinping dhe Presidentit mongol Ukhnaagiin Khurelsukh, kompania shtetërore ruse Gazprom njoftoi se marrëveshja është tani ligjërisht e detyrueshme. Kjo është një përgjigje ndaj humbjeve që Rusia ka pësuar në tregun europian pas sanksioneve nga Perëndimi për shkak të Luftës në Ukrainë. Putin njoftoi gjithashtu se çmimi i gazit për Kinën do të jetë më i ulët se ai për vendet europiane, duke ofruar një kontratë 30-vjeçare furnizimi.
Atmosfera e takimit në Sallën e Madhe të Popullit e pasqyronte një aleancë gjithnjë e më të fortë mes dy vendeve, në një kohë kur Moska synon të sfidojë izolimin diplomatik dhe Pekini kërkon të pozicionohet si një rival global ndaj SHBA-së. Putin foli për lidhjet historike me Kinën, duke i referuar bashkëpunimin si një aleancë natyrale, ndërsa Xi e quajti atë një “mik të vjetër” dhe theksoi që marrëdhëniet kanë “rezistuar provës së kohës”.
Analistët e shohin këtë vizitë si një përpjekje për të forcuar mbështetjen ndërkombëtare për Rusinë, e cila po përballet me presione të vazhdueshme nga Perëndimi. Ngjarja do të kulmojë me një paradë ushtarake në Pekin, ku do të jetë i pranishëm edhe lideri i Koresë së Veriut, Kim Jong Un, duke përforcuar kështu aleancën mes dy vendeve. Kjo vizitë është më e gjata për Putinin në një vend të vetëm që nga shpërthimi i luftës në Ukrainë, duke shënuar një moment të rëndësishëm në rishkrimin e ekuilibrave globalë.
