Këngëtarja, Bleona Qereti, ka depozituar një padi në Gjykatën e Lartë të Nju Jorkut, Konteja Queens, më 15 gusht 2025, duke kërkuar 2 milion dollarë dëmshpërblim për dëmet e shkaktuara nga shpifjet dhe dezinformatat që ka shpërndarë Evi Kokalari që prej vitit 2022.
Në kërkesën ligjore, Bleona akuzon Kokalari për fushatën e vazhdueshme të shpifjeve dhe sulmeve ndaj saj, të cilat kanë për qëllim dëmimin e reputacionit të saj dhe minimin e karrierës profesionale. Padi e depozituar në emër të Bleonës përmes Studios Avokatore Waymaker LLC shpjegon se veprimet e Kokalari janë të qëllimshme dhe dashakeqe, duke përfshirë publikimin e deklaratave shpifëse në rrjetet sociale dhe media, denigrim të Bleonës në mjediset profesionale dhe përpjekje për bojkotimin e eventeve ku ajo ka marrë pjesë.
Fushata e shpifjeve e filluar nga Kokalari ka përfshirë dezinformimin e figurave politike në SHBA dhe Shqipëri, duke tentuar të krijojë një imazh të shtrembëruar të Bleonës për interesat personale të Kokalari. Këto veprime kanë shkaktuar dëme të parikuperueshme në imazhin dhe karrierën e Bleonës, duke bërë që ajo dhe familja e saj të përballen me sulme të ulëta publike.
Sipas Bleonës, dëmi emocional ka qenë i thellë për të dhe për prindërit e saj, të cilët janë detyruar të përjetojnë këto sulme në sytë e publikut. Në përpjekjen për të mbrojtur reputacionin dhe karrierën e saj, Bleona kërkon që Evi Kokalari të mbajë përgjegjësi ligjore për veprimet e saj dhe për të rivendosur të vërtetën.
“E vërteta është e dokumentuar dhe dëshmitarët janë të shumtë. Kjo sjellje e Kokalari nuk mund të kalojë pa u marrë parasysh ligjërisht. Publiku ka të drejtë të dijë faktet dhe të mos mashtrohet nga dezinformimi,” – deklaroi Bleona Qereti në një postim pas depozitimit të padisë.
