Presidenti Donald Trump ka vendosur të anulojë mbrojtjen nga ‘Secret Service’ për ish-Zëvendëspresidenten Kamala Harris, vetëm shtatë muaj pas përfundimit të mandatit të saj. Ky vendim ka shkaktuar një reagim të fortë në politikën amerikane, sidomos në kontekstin e përgatitjes së Harris për një turne kombëtar promovimi të librit të saj, “107 Days”, që trajton periudhën e saj gjatë zgjedhjeve presidenciale të 2024-ës.
Sipas ligjit federal të vitit 2008, ish-zëvendës presidentët gëzojnë mbrojtje për gjashtë muaj pas përfundimit të detyrës, me mundësi për zgjatje në raste të veçanta kur ekziston një rrezik i shtuar. Burime të CNN raportojnë se Joe Biden kishte nënshkruar një urdhër për zgjatjen e mbrojtjes së Harris për një vit, vendim që tani është anuluar nga Trump.
Megjithëse vlerësimet e fundit nuk kanë identifikuar ndonjë rrezik të menjëhershëm ndaj Harris, stafit të saj ka shprehur shqetësim për kërcënimet e mundshme ndaj saj, duke e pasur parasysh pozitat e saj si gruaja e parë dhe personi i parë me ngjyrë që ka mbajtur këtë detyrë. Kërcënimet ndaj saj përfshinin, sipas raportimeve, plane për atentate dhe materiale me gjuhë të dhunshme.
Kjo situatë ka nxitur kritikë nga figura të rëndësishme në Kaliforni, si guvernatori Gavin Newsom dhe kryetarja e bashkisë së Los Angeles, Karen Bass, të cilët e quajtën vendimin politikisht të motivuar dhe të rrezikshëm. Një analist, Ronald Kessler, theksoi gjithashtu faktorët logjistikë, duke e përshkruar Shërbimin Sekret si të mbingarkuar.
Ndryshe nga ish-zëvendës presidentët, ish-presidentët amerikanë gëzojnë mbrojtje të përhershme. Ky ligj ishte nënshkruar nga Barack Obama dhe ndryshon nga politika për zëvendësit, të cilët duhet të garantojnë mbrojtje private për çdo nevojë të sigurisë që kanë. Për Harris, kjo do të nënkuptojë kosto të konsiderueshme në mënyrë që të sigurojë një mbrojtje adekuate gjatë turneut të saj mediatik, që mund të arrijë miliona dollarë në vit.
