Protestë para Universitetit të Mjekësisë, revoltohen gjimnazistët: 48 orë s‘mjaftojnë për regjistrimin, rrezikojmë studimet!

Qindra gjimnazistë të cilët janë shpallur fitues për studimet e larta në Universitetin e Mjekësisë, ndodhen përpara dyerve të këtij universiteti edhe në këtë orë të vonë të kësaj të premteje, ditë që shënoi nisjen e regjistrimit të tyre në fakultete. Ky proces do të vazhdojë deri më 11 shtator.

Gjimnazistët fitues shprehen mjaft të revoltuar. Sipas tyre, për shkak të radhëve të gjata dhe vonesave të krijuara në Universitetin e Mjekësisë për regjistrimin e tyre, rrezikojnë të humbasin degën e fituar.

Kjo, për shkak se në momentin që studenti shpallet fitues i një dege, ka kohë vetëm 48 orë për t’u regjistruar. Në të kundërt, shansi për të fituar mundësinë e studimit i kalon studentit pasardhës në listë në fazën e radhës.

Studentët të shoqëruar edhe nga prindërit e tyre, janë mbledhur në formë proteste përpara Universitetit të Mjekësisë. Ende nuk ka një reagim nga Ministria e Arsimit apo edhe nga vetë universiteti.

Nuk kanë munguar debatet edhe mes studentëve të cilët janë në panik, me shpresën për të kapur degën e shumëkërkuar të studimit siç është ajo e mjekësisë.

Periudha e regjistrimeve është parashikuar në 7 faza regjistrimi, por çdo fazë ka 48 orë. Ajo që studentët kërkojnë me ngulm, jo vetëm këtë vit, pasi kjo situatë është e përsëritur, është zgjatja e kohës së fazës së regjistrimit, pra më shumë se 48 orë.

Sipas tyre, një situatë e tillë krijon vështirësi apo edhe pamundësi që ata të regjistrohen në vendin e fituar.