Policia e Shtetit ka bërë një apel të premten për të gjithë drejtuesit e automjeteve dhe motomjeteve që të tregojnë kujdes maksimal gjatë fundjavës. Thirrja vjen si pasojë e shkeljeve të shumta të konstatuara, por edhe për shkak të parashikimit të motit me reshje shiu, të cilat mund të ndikojnë në sigurinë rrugore.
Policia rrugore kërkon respektimin e disa rregullave themelore për të shmangur aksidentet:
Tregoni kujdes në akset rrugore me prani uji.
Respektoni normat e shpejtësisë.
Mos drejtoni automjetin nën efektin e alkoolit. Përdorni transportin publik nëse jeni të dehur.
Vendosni gjithmonë rripin e sigurimit dhe kërkojuni edhe pasagjerëve ta bëjnë këtë.
Shmangni parakalimet e gabuara dhe përdorimin e celularit gjatë drejtimit.
Për drejtuesit e motomjeteve, biçikletave dhe monopatinave
Përdorni jelekë fosforeshentë gjatë natës për t’u bërë më të dukshëm në trafik.
Vendosni gjithmonë kaskë mbrojtëse.
Policia ka njoftuar se shërbimet e saj do të jenë në gatishmëri në rrugët nacionale, urbane dhe rurale, duke përdorur mjete moderne si radare, dronë dhe alkooltestues për të monitoruar zbatimin e rregullave.
Në rast nevoje, qytetarët inkurajohen të telefonojnë pa pagesë në numrin 112.
